Fa 20 ans, lo 6 d’abril de 1994, l’atemptat contra l’avion del president rwandés Juvénal Habyarimana marquèt lo començament del genocidi contra la comunautat tutsi del país e contra los sectors hutus mai moderats. Davant l’impassibilitat internacionala, dins un periòde de cent jorns, gaireben un milion de personas foguèron assassinadas e de desenats de milièrs de femnas, violadas. En 2004, l’ÒNU, a l’ocasion del lançament d’un plan d’accion de prevencion dels genocidis, comencèt de commemorar lo Jorn Internacional de Reflexion sul Genocidi, lo 7 d’abril.
 
Dins aqueste trist vinten anniversari, lo jornal catalan Vilaweb prepausa una lista de vint sits web amb de ressorsas sus fòrça aspèctes restacats al genocidi.
 
— Sit web oficial de la Comission Nacionala de Lucha contra lo Genocidi de Rwanda.
 
— Genocide Archive Rwanda (KMC) es lo portal oficial sul genocidi contra los tutsis. I a de vidèos (amb de transcripcions) de testimònis de subrevivents e de criminals, de procèsses judiciaris amb lo sistèma tradicional Gacaca e las ceremònias de remembre.
 
— Informacion dels tribunals comunautaris Gacaca, sul sit web del govèrn.
 
— Sul sistèma Gacaca, impausat pel govèrn rwandés per ensajar d’accelerar lo procès de reconciliacion nacionala, la realizaira Anne Aghion ne faguèt qualques filmes e de documentaris.
 
— En kinyarwanda, kwibuka vòl dire “remembrar”. Sul sit web Kwibuka20 s’amassan una seguida d’activitats per commemorar la tragèdia de fa vint ans e per ofrir de ressorsas per tal d’empedir que se repetiscan.
 
— Kigali Genocide Memorial Center, lo memorial de la capitala del país.
 
— Paul Rusesabagina, director de l’Hôtel des Mille Collines de Kigali, salvèt de milièrs de personas e inspirèt lo filme Hotel Rwanda (2004).
 
— Sit web del Tribunal Penal Internacional per Rwanda.
 
— Mission de l’ÒNU per Assistir Rwanda (UNAMIR).
 
— Lo comandant canadian Roméo A. Dallaire dirigiguèt en 1994 l’UNAMIR e foguèt testimòni dels chaples. Dempuèi que s’es retirat de l’armada, Dallaire trabalha per sensibilizar sul sindròm d’estrès pòstraumatic dels soldats, d’un costat, e sus la resolucion de conflictes, l’ajuda umanitària e los dreches umans, d’un autre.
 
— Rwanda: How the genocide happened, concís article de la BBC qu’explica lo contèxt qu’arribèt al genocidi.
 
— Après la patz, la sèria de documentaris sus la patz, la memòria e la reconciliacion impulsada pel collectiu Contrast, consagrèt un dels capítols a Rwanda: La reconciliacion obligada (vidèo).

 
— Rwandan Stories es un depaus de vidèos, de fotografias e de reportatges jornalistics centrats sus explorar l’origina, los detalhs e la seguida del masèl, dempuèi lo vejaire dels subrevivents e dels assassins.
 
— Voices of Rwanda: The Rwanda Testimony Film Project, es un projècte que se consagra a daissar una traça orala dels testimònis del genocidi.
 
— Survivors Fund (SURF) es una entitat que, vint ans puèi, contunha de trabalhar per que las victimas del genocidi pòscan refar la vida.
 
— Step Up! American Association for Rwandan Women, es una ONG creada en 2004 per sosténer las femnas e los enfants rwandeses que subrevisquèron als atacs dels extremistas hutus, mai que mai los de tipe sexual.
 
— Exposicion sul conflicte en Rwanda a l’Imperial War Museum anglés.
 
— L’entitat World Without Genocide definís sus aqueste sit web los uèch passatges o estadis d’un genocidi, coma lo de Rwanda: classament, simbolizacion, desumanizacion, organizacion, polarizacion, preparacion, extermini e negacion.
 
— Lo Musèu Memorial de l’Olocaust dels Estats Units explica detalhadament qu’es aquò un genocidi e balha de claus per que se repetiscan pas.
 
— Pendent lo genocidi desapareguèt en Rwanda lo missionari catalan Joaquim Vallmajó. E tres ans puèi, lo 18 de genièr de 1997, l’infirmièra tanben catalana Flors Sirera i foguèt assassinada amb los cooperants Luis Valtueña e Manuel Madrazo. L’entitat Veritas Rwanda Forum denóncia que lo president del país, Paul Kagame, e l’armada èran darrièr aquel assassinat.