Bandièra01 1180x150: Comuna de Tolosa

Actualitats

Apèl a una mobilizacion estatala lo 31 de març


De representants de las lengas dichas regionalas an presentat a París la jornada del 31 de març 


| www.languesregionales.org

Lo collectiu qu'amassa las associacions de defensa de las lengas dichas regionalas de l'Estat francés apelèt divendres a una jornada de mobilizacion estatala lo 31 de març per reclamar als candidats a las presidencialas la ratificacion de la Carta europèa per las lengas minorizadas e una lei de las lengas.





"Reclamam la ratificacion d'aquela carta signada l'an 1999 per Lionel Jospin e una lei que balhe un autentic drech amb una reconeissença per las lengas regionalas que n'an pas", a resumit Tangi Louarn, un dels responsables del collectiu en representant Bretanha, quand se presentèt a París aquela mobilizacion.



D'efièch l’ancian primièr ministre socialista Lionel Jospin signèt la carta del Conselh d’Euròpa, mas lo Conselh Constitucional considerèt que favorissiá los locutors regionals e qu'atemptava contra lo principi d’egalitat. 



De nombrosas manifestacions son previstas pel 31 de març dins un desenat de de vilas (Kemper, Baiona, Tolosa, Estrasborg, Mètz, Perpinhan, Anecí, Aiacciu, Saint-Quentin, Ons-en-Bray, Peitieus), e tanben dins los territòris d’otramar e a Nòva York. 

A Tolosa la marcha es convocada e organizada per Anem Òc!, un collectiu qu'amassa l’Institut d’Estudis Occitans (IEO), las Calandretas e l’associacion Òc-Bi, en collaboracion amb Convergéncia Occitana, e lo Centre Regional d’Ensenhament en Occitan (CREO). Al delà, i an aderit un desenat d’autras entitats e un molon de personas al nivèl individual, qu’an balhat de vam a la convocacion e an fach que los organizaires sián optimistas a respècte del nombre de personas presentas.


Pendent tot lo matin, tre 10h30, la plaça d’Euròpa aculhirà una seguida d’activitats, presentacions e estands de las associacions del país. La cultura, la lenga, la politica, la gastronomia e totas las autras expressions occitanas seràn presentas dins un “Vilatge Occitan” que servirà a demostrar la vitalitat del pòble occitan e a prene de vam per una jornada de revendicacion e de fèsta.



La manifestacion, qu’aurà per devisa “Anem Òc! per la lenga occitana”, farà un bèl percors pel centre de la vila. Sortirà a 14h00 de la plaça d’Euròpa e acabarà sus la plaça del Capitòli. Per anar d’un luòc a l’autre, la marcha seguirà los baloards de Lascrosses, d’Arcole, d’Estrasborg e de Carnot, virarà a drecha per la carrièra de Mètz fins a la carrièra d’Alsàcia-Lorena, ont virarà un autre còp a drecha fins a la carrièra de La Faieta. Ailà serà lo moment per emplenar amb de drapèls occitans la plaça del Capitòli.
 
Après los discorses finals de la manifestacion, tre 18h00 se debanarà una serada amb de concèrts de NadauLo Còr de la Plana e d'autres grops convidats. Vaquí un biais dels bons per clavar una jornada que deu èsser istorica.


Percors de la manifestacion per l'occitan a Tolosa:


Mòstra una mapa mai granda

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

ensaig
2.

  • 0
  • 0
ensaig
1.

  • 0
  • 0

Escriu un comentari sus aqueste article