Bandièra01 1180x150: Comuna de Tolosa

Actualitats

Valls ganha la fisança maugrat lei criticas

Manuel Valls presentèt ièr lo tradicionau discors de politica generala, abordant lei mesuras venentas dins lo domeni de la fiscalitat, de l’ecologia ò encara de l’organizacion territoriala. Sens aver convencut seis opausants, a obtengut aisadament la fisança dei deputats amb 306 votz per e 239 còntra.
 
Dins son discors ièr a l’Assemblada Nacionala, lo nòu primier ministre a confirmat l’esparnha de 50 miliards d’èuros per an a partir de l’an que ven, que 10 miliards seràn fachs per lei collectivitats territorialas. Amb aqueu plan d’austeritat es anonciada una baissa de la fiscalitat, Manuel Valls considerant lo fuelh d’impòst “tròp pesant”. Coma aquò vòu aleujar lo còst dau trabalh en suprimissent lei cotizacions patronalas e d’autrei taxas tanben jutjadas inutilas.
 
Manuel Valls presentèt tanben una politica environamentala ambiciosa, dicha estrategia “bas carbòni” amb l’objectiu, d’aicí a 2030, de reduire de 30% la consumacion d’energia fossila e de 40% leis emissions de gas d’efiech de sèrra. Tanben anóncia, dins l’encastre de la lei sus la transicion energetica, la reduccion de 75% a 50% de la part dau nuclear dins la consumacion d’electricitat en França. Coma aquò lo govèrn s’es assegurat lo sosten deis ecologistas que, s’an quitat lo govèrn, an pasmens quasi totei votat la fisança au primier ministre.
 
 
Retorn dei reformas territorialas
 
Lo primier ministre francés anoncièt tanben ièr de cambiaments grands per lei collectivitats territorialas de l’Exagòn. Primier, coma foguèt ja considerat, lo nombre de regions serà devesit per dos. Lei regions que vòlon fusionar o poiràn far fins a l’an que ven mai, en l’abséncia d’acòrdi mutuau, avisa Manuel Valls, lo govèrn trencarà e prepararà una lei de retalhada que serà efectiva en 2016.
 
Encara amb l’objectiu d’esparnhar e de simplificar l’organizacion dei collectivitats, es anonciada la supression dei conseus departamentaus d’aicí a 2021, que fusionaràn amb lei conseus regionaus. L’executiu socialista se revira donc après aver anullat una lei de l’anciana majoritat que preveguèt la mesa en plaça d’aqueu novèu conseu territoriau. La ministra de la descentralizacion en persona, Marylise Lebranchu, declarèt a la debuta de l’annada que lo departament èra lo “pilar de l’organizacion territoriala francesa”. Lo president socialista de l’Assemblada dei departaments condemna la brutalitat d’aquela decision e demanda d’explicacions a son primier ministre.
 
Enfin Manuel Valls prepausa la supression de la clausa de competéncia generala que permet a una collectivitat d’intervenir dins lo domeni que vòu. A l’avenir lei competéncias seràn exclusivas.
 
 
Un discors patriotic fòrt
 
Se pòu pas far lo bilanç dau discors de Manuel Valls en ocultant sa dimension patriotica francesa, presenta tot de lòng de son allocucion, citant de nombrós còps la grandor de l’identitat francesa. “Vòli una França fòrta e la Republica es l’esséncia de nòstra nacion”, declarèt lo natiu de Barcelona, considerant que fau èstre “fièr d’èstre francés”.
 
Tanben lo nòu cap de govèrn a defendut la politica estrangiera de França e lei guèrras menadas per l’armada francesa en nom de la democracia en Centreafrica e Mali. Considèra enfin que lei recentei declaracions dau president de Rwanda sus lo ròtle de França pendent lo genocidi son “d’acusacions indignas”.
 
 
Leis oposicions pas convencudas
 
A despart dei Verds, que se son fachs encara remarcar per son pragmatisme politic en donant majoritàriament sa fisança au govèrn, d’autrei presidents de grops que se son seguits a l’ajocador de l’Assemblada an pas amagat lei criticas.
 
Coma aquò Christian Jacob, per l’UMP, considèra que François Hollande foguèt elegit per malentendut e planh que lo PS non càmbie pas de politica. Refusa per exemple la reforma dau ritme escolar que Manuel Valls vòu conservar mai amainatjar. Demanda tanben de non pas crear 60 000 emplecs dins l’Educacion Nacionala, una “politica clientelista” segon lo deputat UMP.
 
En cercant sens dobte lei referéncias de senèstra dins lo discors de Manuel Valls, puei bensai maucontent de pas èstre citat coma partenari privilegiat dau govèrn, lo president dau grop GDR condemnèt ièr çò que considèra coma lo “refortiment d’una politica liberala en rompedura amb leis espèrs de la populacion”. Lei dètz deputats dau Front de Senèstra, que s’abstenguèran en 2012 per Jean-Marc Ayrault, an donc votat còntra la fisança a Manuel Valls.
 
 
 
 
Matieu Casanòva

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Terric Lausa Quilhan
3.

Mens de moneda per las collectivitats, mens de regions = mai de poder, tot lo poder a l'estat francés, dit autrament lo poder entre las mans dels sens-vergonha que se prenon per la raça dels senhors.

França confisca la democracia occitana.

França es l'enemic politic d'Occitània. Òm discutís pas amb un enemic politic. Òm lo combat.

Valls es pas res dins tot aquò. Es lo, bavassejaire del moment del francofaissisme, la forma naturala e multiseculara del poder de l'estat francés.

  • 5
  • 1
Gerard Joan Barceló Pèiralata
2.

#1 De segur, França farà pas res de positiu per nosautres secontunham d'esperar que s'interèsse a nosautres. Sèm nòstres pròpris amics e nòstres pròpris enemics. Amics s'assumissèm enfin una consciéncia nacionala amb totas las consequéncias socialas, economicas, culturalas e politicas. Enemics se demoram passius.

  • 5
  • 0
Rotland Marmanda
1.

Vòlon devesir lo nombre de regions per dos. Aquí quicòm que va regaudir los ''regionalistas'' occitans o tanben los que lor agrada de far de sòmis o de mapas del costat de Pampaligòssa (en tot pensar que l'estat francés farà de regions segon de critèris culturals o lingüistics e que tendrà compte de la "realitat'' occitana, de segur ...).
E puèi n'i a d'autres (los actors culturals per exemple, occitans o pas) que se fan de laguis. Sabon que sens departament e ambe dos còps mens de regions qu'a l'ora d'ara, se veiràn las pèiras per trobar de moneda (auràn mens d'interlocutors, alavetz mens de subvencions ...). Fin finala, tot va plan e l'extrèma drecha pòt contunhar de nos rosegar.

  • 1
  • 0

Escriu un comentari sus aqueste article