Bandièra01 1180x150: Comuna de Tolosa

Actualitats

Val d’Aran: setmana Santa en Bossòst

Era vila aranesa que consèrve era procession

| CGA
Era Setmana Santa, periòde laguens deth calendari liturgic catolic a on se rememòrien es hèts dera passion, mòrt e resurreccion de Jèsus Crist, a un fòrt arraïgament culturau e hestiu en Aran.
 
Aquera difusion e era sua fòrça narrativa e simbolica se son exprimides istoricaments a trauèrs de representacions, rituaus e ceremònies, que n’includissen ua carga e tension dramatica importanta: personatges coma es armadi; figures coma es penitents, que sèrven er anonimat deth sòn sofriment jos tuniques e vèstes; d’auti personatges e figures, ja siguen umanes o escultoriques, que representen as protagonistes e es hèts condadi pes evangèlis o pes advocacions dera religiositat populara, sense desbrembar es representacions teatraus dera Passion, d’origina medievau.
 
Era procession de Bossòst ei possiblaments ua des mès espectacloses e istoriques que se realizen en Setmana Santa. Se recurbís tot eth presbitèri dera glèisa damb uns plafons de husta damb tela pintada a on se representen ath Diu Creador e scènes deth Sant Sopar, dera Passion e dera Resurreccion. Aqueres pintures daten de fins deth sègle XVI o començament deth XVII. D’auti guarniments floraus conformen aquera capèla funerària efemèra e singulara qu’acuelh eth Còrs de Crist (era Eucaristia), mentre represente que Jèsus ei mòrt.
 
En Bossòst i trapam diuèrsi personatges: es Armadi, es  Nazaretencs e eth Cirinèu, era Veronica, Maria Magdalena, es “Ploraires”, era Samaritana, dus Armadi Dançaires, mainatges vestidi d’àngels o de nazaretencs. Tanben i participen diuèrsi passi. Era contextualizacion dramatica des Armadi de Bossòst en seguici resulte fòrça ajustada as hèts dera Passion, donques que non dirigissen era procession, mès que se placen escortant Jèsus eth Nazaretenc, tau e coma narren es tèxtes evangelics.
 
A delà de bèri passi e scenificacions deth Viacrucis, participe ena procession eth pas deth Sepulcre, que represente es funeralhes de Jèsus. Es passi deth Nazaretenc e era Pietat son portadi a espatles des vèstes, deth temps qu’era Dolorosa ei portada per hemnes endolades. Aqueres processions de Bossòst son conservades dempús 1879.
 
Se trèn es imatges de Crist Ressuscitat, portada e acompanhada pes òmes, e era dera Mair de Diu, portada per gojates e acompanhada pes hemnes. Represente eth rencontre entre Jèsus e Maria dempús dera Resurreccion.
 
Es dues imatges gessen dera glèisa, mès per pòrtes diferentes e hèn era procession per carrèrs diferenti. Es Armadi acompanhen eth Crist Ressuscitat, damb un aute ritme, joiós e alègre. Es dues imatges se trapen ena scèna dera amassada, en tot representar que se hèn un punet. Un còp retrobat tornen amassa tara glèisa.
 
 
 
 
Conselh Generau d’Aran
 
 

 
fffff  fffff
 Setmana Santa en Bossòst:

— 17 d’abriu. De 19h00 a 21h00
— 18 d’abriu. Entàs 10h00 e de 19h00 a 21h00 e 22h30
—  20 d’abriu. Entàs 13h30
 
     

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article