Bandièra01 1180x150: Comuna de Tolosa

Actualitats

Legislativas: los francés establits fòra França an votat socialista

Los 2 e 3 de junh, los francés que vivon fòra França votavan per lo prumier còp per elegir daus deputats. An mes lo partit socialista en prumier dins la majoritat de las circonscripcions

| Mike Pulsifer

Qu’era lo prumier còp que los francés establits fòra França votavan per elegir daus deputats, en seguda de la refòrma constitucionala de 2008. Onze circonscripcions consularas fugueron creadas per ilhs. Los electors avián la possibilitat de votar tradicionalament dins lor consulat, per correspondéncia o per Internet. Fòrça pauc zo fagueron: l’abstencion es pertot de mai de 75%, daus còps d’acianta a 88% coma en Africa de l’Oest e dau Nòrd o dins la circonscripcion Asia-Pacific. Es mai importanta que la de l’eleccion presidenciala dau mes de mai, qu’era de 60%. Las resultas provisòrias an estats publiadas per lo ministeri daus afars estrangiers jos reserva de modificacion de la comission electorala.


Alaidonc que Nicolas Sarkozy era ‘ribat prumier au segond torn de l’eleccion presidenciala, son los socialistas e lors aliats ecologistas que ganhan queu torn (set circonscripcions sus onze). Per lo segond, los electors auràn la chausida entre lo candidat de la majoritat presidenciala e lo de l’UMP. 
 
Dins la prumiera circonscripcion, Estats-Units e Canada, la socialista Corinne Narassiguin ‘riba prumiera (39,65%) davant l’ancian secretari d’Estat au comerci, Frédéric Lefebvre (22,08%). Mas la preséncia de fòrça candidats de drecha fai que la victòria socialista es pas segura.
 
Dins la segonda circonscripcion, America latina e Cariba, l’ecologista Sergio Coronado, sostengut per lo PS, es prumier (35,88%) davant l’UMP Pascal Drouhaud (22,77%). Un autre candidat fai mai de 10%: l’independenta de drecha Françoise Gonzalez Lindemann (16,09%). De notar la bona resulta de Raquel Garrido (8,60%), avocata de Jean-Luc Mélenchon, que lo supleant era lo chantaire Nilda Fernandez. 
 
Dins la tresesma circonscripcion, Euròpa dau Nòrd, la candidata Axelle Lemaire (30,20%) se plaça davant l’UMP Emmanuelle Savarit (21,63%). Quela circonscripcion es una de las que lo PS deuriá ganhar. D’efiech, François hollande i es ‘ribat emb 53,10% siá 1,5% de mai que sa resulta nacionala. Dos autres candidats fan mai de 10%: lo centrista Olivier Cadic (11,34%) qu’era considerat coma lo concurrent màger a drecha d’Emmanuelle Savarit e l’ecologista Olivier Berton (10,32%).
 
Dins la quatresma circonscripcion, Benelux, Philippe Cordery (30,38%), secretari generau dau partit socialista europeu e l’anciana ministra UMP Marie-Anne Montchamp (21,15%), qu’aviá fòrça concurréncia, se qualifian per lo segond torn. L’ecologista Perrine Ledan, marcada au movement belga Ecolo e a EELV, es en tresesma posicion emb 10,19%.
 
Dins la cinquesma circonscripcion, peninsula iberica e Monegue, la candidata UMP, Laurence Sailliet (31,88%) es prumiera davant Arnaud Leroy (30,52%), candidat socialista. De notar qu’en tresesma posicion, se tròba l’ecologista e femna politica valenciana Carolina Punset (9,49%).
 
Dins la sieisesma circonscripcion, Soïssa, lo prumier torn mena a un duel entre l’UMP Claudine Schmid (34,20%) e una anciana deputada socialista au parlament de Geneva, Nicole Castioni (27,09%).
 
Dins la setesma circonscripcion, Euròpa centrala e balcanica, lo socialista Pierre-Yves Leborgn' (40,08%) ‘riba plan davant Ronan Le Gleut de l’UMP qu’a nonmàs 28,56% de las votz. 
 
Dins la uechesma circonscripcion, país mediterraneus, la candidata PS Daphna Poznanski (30,50%) es davant l’UMP Valérie Hoffenberg (22,20%). Es pertant una circonscripcion de drecha que compren Israel ente los electors voteron a 92% per Nicolas Sarkozy. Philippe Karsenty, candidat centrista que faguet una campanha plan virulenta contra Valérie Hoffenberg, a obtengut 14,45% de las votz. L’ecologista Pierre Jestin ne’n a obtengut 10,50%. 
 
Dins la novesma circonscripcion, Africa dau Nòrd e de l’Oest, lo candidat socialista Pouria Amirshahi a mancat de se far elegir au prumier torn. A obtengut 47,23% de las votz. Serà fàcia la candidata UMP Khadija Doukali (24,82%). L’abstencion a estat la mai fòrta de totas las circonscripcions emb 88,91%.
 
Dins la diesesma circonscripcion, Africa e Mejan Orient, l’ancian deputat lemosin UMP e ancian jutge antiterrotista Alain Marsaud es,  emb 32,13%, davant lo socialista Jean-Daniel Chaoui (28,85%). La candidata independenta Patricia Elias Smida a obtengut 10,71% de las votz.
 
Dins la onzesma circonscripcion, Asia e Pacific, l’ancian ministre e deputat de Vau Clusa Thierry Mariani (UMP) es prumier emb 32,59% davant lo socialista Marc Villard (26,65%). Sa victòria es mai que probabla dins una circonscripcion que votet a 57,60% per Nicolas Sarkozy.
Mas l’abstencion i era plan fòrta: 88,61%.
 
Lo segond torn se debanarà la mesma dimenjada qu’en França, lo 16 e 17 de junh. Lo desfi de la majoritat presidenciala es de concretizar l’avantatge dau prumier torn en ganhar lo mai de deputats ‘laidonc que los francés establits fòra França  voteron Sarkozy au mes de mai.



Maime Caillon

 

_____
Los resultats se pòdon consultar
sul sit del Ministèri dels Afars Estrangièrs.
 
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article