Bandièra01 1180x150: Comuna de Tolosa

Actualitats

Catalonha enebirà lèu los espectacles de circ amb d’animals

Una associacion animalista o a prepausat al Parlament de Catalonha. Totes los partits o sostenon levat lo Partit Popular e Ciutadans

Los espectacles de circ amb d’animals que s’acabaràn lèu en Catalonha. La setmana que ven, lo Parlament catalan deurà aprovar l’examen d’una propòsta de lei per enebir aquela practica. La propòsta a lo sosten de totes los partits politics levat del Partit Popular e de Ciutadans, que s’i opausan.
 
Aquela iniciativa es arribada al Parlament catalan per mejan de l’associacion animalista Libera. Lo tèxt lo donaràn per debatre en comission e, segon çò previst, Catalonha vendrà la primièra comunautat autonòma de l’estat espanhòl qu’enebirà la preséncia d’animals dins los espectacles de circ.
 
La proposicion soslinha que los animals vivon encadenats, que son sovent transportats d’un luòc a l’autre e privats d’estimulacions naturalas, çò que lor causa de situacions “d’apatia, depression e neuròsi”.
 
Las associacions animalistas se mòstran plan contentas, del temps que las companhiás de circ que trabalhan amb d’animals —solament una en Catalonha— la critican.
 
Cal dire que i a ja un centenat de municipis catalans que se son engatjats e qu’a l’ora d’ara permeton pas aquela sòrta d’espectacles.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pascau
1.

Ger qu'interdisèn la corrida,
Uei las gàbias dens los circs...
Doman .... ????

Visca Catalonha!

Lutem entà que s'arreste l'espleitacion de TOTS los animaus (umans comprés) en Occitania tanben... e per tot lo monde !

Tots a Tolosa per har BARRAR LOS TUADERS lo 7 de junh!

http://fermons-les-abattoirs.org/toulouse (lo tract en occitan qu'ei a la fin, imprimable a volontat...)

  • 1
  • 0

Escriu un comentari sus aqueste article