Lo doblat per Tolosa
 
Lo temps èra propici al jòc de rugbi de XIII aqueste dissabte de vèspre a Perpinhan. 7500 espectators seguiguèron las doas partidas de la vesprada. En juniors, los limosencs se mostrèron plan valents mas pleguèron a dètz minutas del tèrme: 24-20 pels tolzans que fan lo doblat Copa Nitard-Campionat.
 
Lo temps per Vilanuèva de ganhar lo Torneg de Rugbi de 7 contra Palau e las esquipas de Tolosa e Lesinhan dintravan sul terrenc per jogar la finala del campionat d’Elèit 1. Tre la segonda minuta, los audencs perdián lo segonda linha Dustin Cooper, nafrat a la camba. Tolosa ensacava una penalitat. Al cap d’un quart d’ora, l’arrièr tolzan Marc Keirallah començava sa quista d’ensages de la vesprada. Benausse passava una penalitat mas Quintilla ajustava un segond ensag pels tolzans; l’arbitre refusava sens demandar la vidèo un ensag als lesinhaneses per un despart fòra jòc gaire evident. Los tolzans dintravan al vestiari amb un avantatge bèl de 14 a 2. A la 47a minuta, Keirallah tornava vistalhar l’enbut audenc.
 
Los lesinhaneses se lançavan d’un biais un pauc desordonat a l’assaut d’una defensa tolzana rigorosa. Se fasián contrar per dos novèls ensages dels Blaus: Wood (63a) e Moliner (66a). La partida èra jogada, Tolosa daissèt un pauc de còrda; alara los Verds e Blancs ramosèron las darrièras fòrças per marcar dos còps pel mesclanha Carrère (69a) e pel pilar Ancely (73a). Coma un simbòl, la còrna restontiguèt sus una traucada de Keirallah que s’acabèt darrèr la linha dels Verds e Blancs; amb las 5 transformacions passadas per l’arrièr tolzan, lo planchòt final balha un 38-12 pels campions novèls, autors del doblat Copa-Campionat coma lor esquipa junior. Ara, lo sòrt tolzan se va jogar del costat de Londres amb la decision avenidoira d’aicí la fin del mes de l’acceptacion de la candidatura del club per la Superliga 2, l’an que ven, amb l’objectiu d’èsser en Superliga en 2016. Sòmi o realitat, that’s the question!
 
Aqueste dimenge 18 de mai, Baó e Albi se disputaràn lo trofèu d’Elèit 2 a Tonens, l’una de las plaças fòrtas del XIII en Aquitània. Dimenge tanben, a Toluges, la Copa Déjean serà en jòc entre Vilagalhenc-Argon e Sant-Llorenç de Salanca mentre que Vilanuèva de Menerbés ensajarà de servar lo bloquièr de Nacionala 3.
 
 
Los Dracs son catastrofics!
 
La setmana passada, metiam coma titol a aquesta cronica: “Los Dracs son diabolics”. Divendres de ser, a Warrington, los Dracs tornèron a lors barrutlages de debuta de sason amb una esquipa sens èime sus la pelena, sens menaire de jòc e agent daissat lo nhac tampat a clau dins una sala secreta del Castellet (esperam que n’an pas perduda la clau!). Resulta sens pietat: los Lops se faguèron un chapàs bèl: 42-10!
 
Cal tornar en Anglatèrra aqueste dissabte per dobrir la Dimenjada Magica, a una ora e mièja del vèspre. En fàcia: los London Broncos qu’an pas encara ganhada una partida. Seriá plan que los Dracs foguèsson pas las primièras victimas de l’an dels londinencs. De notar que Be In Sport assegurarà la difusion dels sèt rescontres de la dimenjada. Acabarem en saludant la novèla victòria obtenguda per l’esquipa de França de XIII cadieral suls angleses divendres de ser, sus la marca neta de 64-46 al Kindarena de Roan.
 
 
 
 
Alan Roch