Bandièra01 1180x150: Comuna de Tolosa

Actualitats

Rugbi XIII: los Dracs fan estrementir

Laurenç Garnièr dintra de Brisbane a la fin de mai per entraïnar Carcassona XIII
Laurenç Garnièr dintra de Brisbane a la fin de mai per entraïnar Carcassona XIII
Dimenjada magica
 
Dissabte, los Dracs dobrissián la Dimenjada Magica a Manchester fàcia als London Broncos. Los catalans dominèron la debuta de la partida, mas se faguèron prene en contra. Urosament, Duport a la recepcion d’un còp de pè de Bòsc e Whitehead al relèu de Pomeroy permetián als sang e aur de menar 12-6 a la pausa. A la represa, Jeff Lima en fòrça marcava entre los pals. Mas los londinencs profeitavan de las bontats catalanas en defensa per egalizar a 18 pertot. Whitehead traucava, lançava Oldfield sus l’ala que tornava centrar sus el; amb la transformacion de Bòsc, los catalans tornavan prene l’avantage. A 5 minutas del tèrme, lo mesclanha advèrs Drinkwater puntava l’ensag, mas mancava la transformacion que remandava un còp de mai son equipa al pan sec e a l’aiga. 22-24: tretzena desfaita de la sason!
 
Pel primièr còp, lo limosenc Maxim Herold a jogat dins l’esquipa anglesa. En seguida, Widnes batiá Salford, 30-24: la cordelada de vedetas dels Diables Roges sufís pas per obténer de victòrias. Puèi, los Barbarós d’Hull KR desfisavan las règlas basicas de l’ornitologia e tornavan prene l’avantatge sus las Aglas de Mar d’Hull FC, 38-24, mentre qu’a la meteissa ora, l’esquipa de fotbòl de la vila perdiá la finala de la Cup contra Arsenal en prolongacions!
 
La darrièra partida del dissabte vesiá lo campion Wigan batre lo cap de fila Leeds: 18-14.
 
La vesprada de dimenge se dobriguèt amb doas partidas desequilbradas: victòria dels Tigres de Castleford suls Gats Fèrs de Wakefield, 50-12, e dels Gigants d’Huddersfield suls Taures de Bradford, 54-16.
 
Lo darrièr rescontre podiá permetre a Saint Helens de prene la primièra plaça, mas los Lops de Warrington mai actius e mai ofensius mestregèron la partida: 41-24. Los Sants ensagèron plan de tornar e a 36-6 marquèron tres ensages en seguida. Mas un tombat e una intercepcion lor i manlevèron las darrièras illusions.
 
La dimenjada a conegut lo mai grand nombre d’espectators (mai de 65 000) dempuèi sa tenguda a Manchester. Los Dracs se trapan novens al classament a egalitat de punts amb Hull KR mas amb una diferéncia de punts bèla (mens 82 pels catalans e mai 18 pels angleses). Hull FC es dos punts darrèr e Salford a tres punts. Serà pas aisit de dintrar dins los uèit primièrs.
 
Dissabte, a tres oras del vèspre, a Brutus, es una autra partida-trapanèla qu’espèra los Dracs contra Bradford, la formacion que los eliminèt de la Cup.
 
 
En Elèit
 
Las esquipas d’Elèit 1 preparan la sason a venir. Per l’ora, lo president de la Federacion a anonciat lo meteis format de competicion. Limós serà entraïnat per Olivièr Janzac e ditz sa volontat de s’apiejar suls joves qu’an jogadas las doas finalas juniors. Carcassona ven d’embauchar lo catalan de Brisbane, Laurenç Garnièr, per menar l’esquipa. Aurelian Cologni demòra a la direccion de l’FC Lesinhan.
 
Distribucion de bloquièrs e de Copas
 
Baó a ganhat lo bloquièr d’Elèit 2 fàcia a Albi: 18-12 (2-1 a la pausa!). En Nacionala 3, Vilanòva de Menerbés consèrva son trofèu al tèrme d’una partida arrestada a la pausa contra Ménnecy, mentre que los audencs menavan 16-10: domatge per l’espòrt. Lo títol Elèit de las femeninas es per Factura-Biganòs (victòria fàcia a Tolosa-Ovalia: 22-14). Lo Vilagalhenc-Aragon Rugby League sèrva la Copa Déjean (victòria sus Sant Llorenç de Salanca: 34-16) e los Arlequins de Limós-Flassian ganhan lo Challenge Dubarry (aitant dire la competicion de Federala) contra Toluges: 32-22.
 
En juniors nacionals, victòria de Baó sus Sant Gaudenç, 55-16, en finala de la Copa Tarborièch. Enfins, cal saludar los juniors U18 de l’esquipa de França que tenguèron lo còp fàcia als angleses abans de plegar sus un ensag a la darrièra minuta: 34-30.
 
 
 
 
Alan Roch
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article