Bandièra01 1180x150: Comuna de Tolosa

Actualitats

Rugbi XIII: los Dracs manjan de taure

Vint segondas de jòc dissabte de vèspre a Brutus e Morgan Escarré èra ja darrèr la linha dels Taures de Bradford. Lo ton de la partida èra balhat. Quauquas minutas mai tard, l’arrièr e l’alièr angleses se gaitavan sus una candela de Pryce, esperavan lo rebomb: Whitehead lor i preniá la pauma jol nas e anava entre los pals. Sul còp de pè d’engatjament, Mike Oldfield marcava sens oposicion: 18-0; lo trauc èra fait. Aqueste còp, los Dracs tenguèron fins a la pausa. E tornèron prene sul meteis ritme: novèl ensag de Morgan Escarré, puèi veniá al pilar Miquèl Simon de s’amorrar entre los pals. L’alièr Foster marcava un ensag dins son canton, mas los Dracs anavan marcar encara tres còps abans la còrna: l’alièr Millard sus una passa al pè de Baile, lo menaire de jòc Pryce e, coma a la parada, lo segonda linha Zeb Taïa. Uèit ensages en tot pels catalans amb sèt transformacions de Tomàs Bòsc: un 46-4 net e precís que permet als Dracs d’esperar tornarmai dins la qualificacion per las pelhòfas. Los 42 punts d’escart menan a una diferéncia de punts marcats/encaissats plan mendra: aquò poirà servir al moment del descompte final.
 
Un novèl resultat positiu aqueste divendres de nuèit a Widnes, que ven de pèrdre a Castleford 34-22, confortariá aquesta enveja.
 
En NRL, Remi Casty a enfins jogat una partida de campionat amb los Roosters fàcia a Canterbury e a pres sa part dins la victòria de son esquipa (32-12). Mas, per l’ora, en Austràlia, òm se prepara a la primièra confrontacion de las tres de l’an del States of Origin aqueste dimècres 28 de mai.
 
Al país, aqueste dimenge, a Aussilhon, La Reula se ganhèt lo bloquièr de campion de Nacionala 1A contra Entraigas 30-26 mentre que Ferrals de las Corbièras batiá Ramonvila 33-20 per venir campion de Nacionala 1B.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article