Los taxistas de las principalas vilas europèas an manifestat contra las aplicacions de telefòn mobil, coma Uber, qu’ofrisson de coveituratge en de veïculs particulars. La protèsta es estada nombrosa a Madrid, Barcelona, Londres e París. Dins la capitala francesa la cauma dels taxistas provoquèt ièr de matin de retencions de transit amb de coas de mai de 300 quilomètres als accèsses de la vila francesa. Aquò es mai del doble d’un jorn amb de problèmas serioses de transit.
 
De centenats de taxis partiguèron amassa, en caravana, dempuèi los aeropòrts Charles de Gaulle e Orly en direccion del centre de París a marcha fòrça lenta. An nomenat aquela protèsta “operacion cagaròl”.
 
A Londres, almens 12 000 menaires de taxis jonguèron la protèsta, que comencèt a miègjorn, e que provoquèt tanben d’importants problèmas de transit. Barcelona vegèt mai de 2000 taxis en protèsta.
 
Lo coveituratge, que fa de temps que se practica per de desplaçaments longs, es fòrça mai aisit tanben pels petits desplaçaments, e aquelas aplicacions per telefòn mobil ajudan fòrça a o far. Es un sistèma fòrça ecologic e economic. Mas los representants dels menaires de taxi parisencs o considèran una “concurréncia desleiala”, per tant, demandan que los poders publics “prengan seriosament” aquel problèma e que “tròben de solucions definitivas per restablir las condicions de concurréncia”. Los taxistas de Londres dison qu’an pas res contra la concurréncia mas qu’“Uber opèra en defòra de la lei”.