Bandièra01 1180x150: Comuna de Tolosa

Actualitats

Comença uèi a Lhèida lo congrès de l’Associacion Internacionala d’Estudis Occitans

Es lo primièr còp qu’aqueste congrès se debana dins un territòri ont l’occitan es lenga oficiala

Comença uèi, e fins al 21 de junh, lo congrès de l’Associacion Internacionala d’Estudis Occitans (AIEO), qu’ongan se debana a Lhèida (Catalonha). I participan 170 expèrts en lenga, literatura e cultura occitanas, provenent de 60 universitats de 12 estats: Espanha, França, Itàlia, lo Reialme Unit, Alemanha, los Estats Units, Brasil, Russia, Japon, Canadà, Belgica e Olanda.
 
Lo congrès l’inaugura a 11h lo conselhièr de la cultura de la Generalitat de Catalonha, Ferran Mascarell, amb la participacion del rector de l’Universitat de Lhèida e lo president de l’AIEO.
 
Las divèrsas comunicacions presentadas al congrès tractaràn l’occitan modèrne, la lenga anciana, la literatura, la cultura occitana e las politicas lingüisticas d’Occitània e de Catalonha, ont la lenga es oficiala.
 
Anuèch es previst un concèrt d’Alidé Sans e dijòus un concèrt-balèti amb Kaj Tiel Plu. Dimècres los congressitas vesitaràn la Val d’Aran.
 
Dins l’encastre del congrès, se liurarà anuèch lo Prèmi Robèrt Lafont, que l’autreja cada dos ans lo Departament de la Cultura de la Generalitat de Catalonha, en reconeissença a la defensa, projeccion e promocion de la lenga occitana.
 
La Cadièra d’Estudis Occitans de l’Universitat de Lhèida organiza l’onzena edicion d’aqueste congrès amb lo sosten de la Generalitat de Catalonha.
 
Pendent aquesta setmana, la redaccion de Jornalet se desplaça a la sedença d’aqueste congrès, d’ont vos ofrirem, coma d’abidud, las informacions de cada jorn.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
11.

#6 Te'n fagues pas. Es que n'i a que son d'adictes de Sant Andriu. Se vòlon far crucificar lo cap enbas sul X. Ièu siái del Sant Andriu de Besièrs, aquel qu'aviá totjorn lo tonelet plen de bon vin pels barrutalires. A! es vertat! Siái un òrre lengadocian!

  • 2
  • 0
Ròdrigò Bigòrra
10.

Jo coma hèra de monde en Gasconha qu'em estacats ad aquera grafia X pormor qu'arrepresenta era nosta istòria , tots eths textes ancians en Gasconha que son escriuts dab X e non pas sh per exemple topomins de nosta, Azereix o Orleix que son estats tostemps escriuts dab X entà nosautis eths Gascons sh n'arrepresenta pas arren se voletz qu'ei ua grafia d'ua i auta lenga .

  • 0
  • 3
Alí Verd Bram
9.

#7 Podètz pas demandar als universitaris (e autres cercaires qu'an pas agut accès al privilègi del títol estnat que las plaças i son plan tròp mlimitatdas) de voler parlar, aparar, oficializar, e institucionalizar l'emplèc de l'occitan a las plaças del pòble d'òc (que manjan contunhadament dins la man d'aquel que lo trepeja despuèi sègles) e dels poders publicas (que de public n'an pas gaire que lo qualificatiu, estant lo mesprètz delqual fan mòstra davant las culturas e lengas dels pòbles)… Sempre mai de coneissença en sciéncias umanas farà pas jamai recuolar l'umanitat. Mas per avançar, basta pas d'aver estudiada la marcha (domani scientific) : cal tanben marchar… e aquò es l'afar de totes e cadun !

  • 2
  • 0
Jig Mimbasta
8.

#3 Punt finau, vertat ? Ac estosse…

  • 0
  • 0
antalya
7.

#5 Entà los lapidaires dels polças :-) Desempuèi las annadas 70 se parla d'occitan. Totis los potz de sciencias an pas poscut inversar la corba del desgalhament de l'occitan.
S'es pas jamai tant parlat de l'occitan, s'es pas jamai tant ensenhat, s'es benlèu pas jamai tant escrit en occitan ! La resulta : s'es pas jamai mens parlat qu'a l'ora d'ara.
I podetz anar dels polças pel debàs vos quilharà pas lo menel. Trobi que las vòstras analisas trucan mai d'un còp; M'enfin la sciencia es de s'enganar e d'o saber e non pas de jogar a vira monil.

vira monil o vira embonil : sorte de danse avec contorsions se voulant envoûtantes e voluptueuses. Surtout pratiquée dans les pays dits du soleil, certains n'hésitent pas à la comparer à la danse dite à tort "danse du ventre"

  • 2
  • 0

Escriu un comentari sus aqueste article