Per mejan del Cultural Institute, Google ven de presentar lo primièr grand musèu en linha d’art urban de carrièra. “Descobrissètz l’art de carrièra, un art efemèr preservat per las generacions futuras”, çò ditz lo nòu portal Street Art Project, qu’aculhís l’internauta amb un espectaclós vidèo en plen ecran de grafitaires en accion dins qualques vilas del Mond.
 
Amb l’ajuda de la tecnologia Street View, la societat californiana a començat d’amassar en linha tot un fum de creacions remarcablas d’artistas de carrièra de fòrça païses. Aital se pòt localizar los autors repertoriats sus una mapamond: i figuran totas las òbras compresas fins ara dins lo musèu, que se pòdon consultar a travèrs de fotografias de nauta resolucion dempuèi totes los angles de vision.
 
Dins qualques cases, las òbras mostradas an ja desaparegut de las carrièras e rèstan, solament, numerizadas sul ret.