Los poders publics desmantelèron ièr de matin, sus òrdre del prefècte, lo sit de La Pareta que lotjava aperaquí 400 personas, dont un centenat d’enfants. Se relotjarà solament 18 familhas. Se tractava del camp de gitanos mai grand de Marselha, dins lo quartièr de Sant Joan dau Desèrt. Las fòrças de l’òrdre arribèron, coma d’abitud, de matin e en seguida arribèron las tractopalas.
 
Coma dins cada expulsion, la majoritat dels abitants avián quitat lo luòc abans, de paur d’èsser victimas d’una repression mai granda al moment d’èsser fòrabandits del sit. Normalament los expulsan de l’estat francés. Aital o explicava a l’AFP lo responsable de la mission dels bidonvilas a Mètges del Mond.
 
 
De son costat, la prefectura defendiá que “lo proprietari” —es a dire, la Comunautat Urbana de Marselha— “a pogut reprene possession de son terren sus lo quau se trobavan, aqueste matin, pas mai qu’un vintenat de personas”. Segon aquela prefectura, la Comunautat Urbana de Marselha a installat un servici de gàrdias privats fins que lo sit siá vendut a un proprietari privat, dins l’encastre d’una operacion d’amainatjament.
 
Amnestia Internacionala planguèt ja dimars, dins un comunicat, que solament 18 familhas serián relotjadas, e mai se la circulara del 26 d’agost de 2012 prevei de solucions de relotjament que se devon prepausar a las familhas per evitar las expulsions secas. “De desenats d’enfants se trobaràn sens sosta amb lors parents, quitament se la velha anavan a l’escòla e accedissián a un minim d’estabilitat”, çò planhiá Amnestia Internacionala.
 
Aqueste camp se quilhèt en octòbre de 2013 après l’evacuacion del bidonvila de la La Capeleta.
 
Après una trèva ivernala, una autra expulsion s’es anonciada per mitat de julhet, al sit de Plombieras, que lòtja un centenat de personas, segon Mètges del Mond.