Bandièra01 1180x150: Comuna de Tolosa

Actualitats

Tolosa: los intermitents que prenen lo poder au Rio Loco

“Que volem véner saunei, shensque bièrra”, “ocupacion = gratuitat”, “resistir qu’ei crear, crear qu’ei resistir”: las banderòlas que florivan aquesta setmana sus la Prada deus Filtres a Tolosa on lo hestenau Rio Loco èra “ocupat” peus intermitents de l’espectacle en cauma. Aqueste movement que’s hè dens l’encastre de la protestacion contra la navèra convencion d’assegurança caumatge qui lo govèrn francés deu signar lo 18 de junh.
 
Dimèrcs, après ua jornada de confusion, la direccion deu hestenau que decidí d’anullar la serada. De dijaus a dimenge, lo hestenau qu’estó mantienut, mes los intermitents qu’i desatalèn parièr e qu’avèn decidit de tribalhar “a mitat”. Un concèrt e un espectacle sus dus que’s tienèn donc com previst e lo rèsta qu’estó anullat. L’entrada, au lòc de costar 5 èuros com previst, qu’èra gratuita mes limitada a 21 000 personas (de costuma lo hestenau que n’arcuelh entre 15 000 e 20 000).
 
Qu’i anèi dissabte e aquiu un pichon testimoniatge qui vau essajar de har pro objectiu tà que ne cabusse pas dens la categoria “opinion”.
 
L’ambient, purmèr, n’èra pas conflictuau briga, ni tenut. Los hestaires qu’i èran nombrós e si semblavan minoritaris a escotar atentivament los devís d’informacions deus caumaires e a encoratjà’us, n’entenoi pas tanpòc arrés a roganhar contra la cauma.
 
Quauques intermitents amistós que tienèn taulèrs dab tractes e peticions e que demandavan moneda a l’entrada entà’us ajudar a continuar la loa luta (shens obligacion, solide: las o los qui ne balhavan pas arren qu’entravan parièr!).
 
Oficiaument los aparelhs fòto qu’èran interdits per la direccion e ne prenoi pas lo men de paur de ne pas poder entrar. Donc qu’averatz ua de las fòtos lèdas qui los jornalistas de la premsa en francés prenón pendent las amassadas generaus deus intermitents.
 
Mes un còp los hestaires arribats, lo sit qu’èra plan mei beròi per’mor lo hestenau qu’arcuelhè tanben artistas plasticians qui avèn hèit pintruras e esculturas monumentaus e, au demiei de las banderòlas de contestacion, daubuas qu’èran calligrafiadas.
 
Pendent lo concèrt deu darrèr grop, Sistema Solar, intermitents que pugèn sus l’empont dab afichas qui resumivan las loas revendicacions e qu’estón aclamats peu public.
 
 
Perqué la cauma?
 
Ua part deus sindicats de las professions de la cultura e de l’audiovisuau ne vòlen pas que lo govèrn recépia l’acòrd “UNEDIC” deu 22 de març entre lo govèrn, lo MEDÈF e ua auta part deus sindicats. Que’u deu recéber aqueste dijaus e que cambiarà las condicions d’accès a l’assegurança caumatge entaus intermitents.
 
L’ocupacion deu Rio Loco que s’inscriu dens un movement plan larg on autes hestenaus estón ocupats o perturbats per las caumas. Que i avó tanben diluns 16 de junh ua cauma generau au medish temps que la de l’SNCF e ua manifestacion a París.
 
 
 
 
Pascau Sebat

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

BOURDON Pau
3.

" L’entrada, au lòc de costar 5 èuros com previst, qu’èra gratuita": he donc, qu'an devut léger l'article de Girbau de ger !

  • 1
  • 0
Pascau
2.

#1 Mercés peu complement!
Shens comptar que l'acòrd devè estar acceptat ger peu govèrn (ne sèi pas enquèra çò qui n'ei estat) e que d'autes hestenaus devèn estar perturbats o annulats peu moviment...

  • 4
  • 0
Claudi Blanhac
1.

La Comuna de Tolosa vòl portar lo clam contra los intermitents que s'apoderèron Rio Loco. L'afar es pas acabat ...

  • 5
  • 0

Escriu un comentari sus aqueste article