Bandièra01 1180x150: Comuna de Tolosa

Actualitats

Un estudi europèu conclutz que Catalonha a un “perfil plurilingüe moderadament naut”

Lo catalan a un “estatut de facto de lenga nacionala”, a la diferéncia de la majoritat de las lengas minorizadas. Lo rapòrt soslinha l’educacion e los servicis socials coma ponches fòrts de la diversitat lingüistica, mas remarca que las escòlas del país an de se melhorar en lo “rendement en lengas estrangièras” e qu’an “d’aprofechar melhor las ressorsas lingüisticas” qu’aduson los immigrants.


De donadas analisadas dins los sectors administratiu, educatiu, mediatic e del trabalh dins tres vilas de Catalonha an permés de conclure que lo país mòstra un “perfil plurilingüe moderadament naut” en comparason amb la mejana europèa, çò diguèt Francesc Xavier Vila, professor de sociolingüistica a l’Universitat de Barcelona e responsable de l’estudi en Catalonha. Lo programa a analisat lo multilingüisme dins 67 vilas de 24 territòris d’Euròpa (17 estats sobeirans e 7 unitats sosestatalas: Frisa, Catalonha, lo Bascoat, Anglatèrra, lo País de Galas, Escòcia e l’Irlanda del Nòrd).
 
Segon Vila, l’estudi —qu’en Catalonha a analisat las vilas de Barcelona, Tarragona e L’Hospitalet de Llobregat— a conclús que lo catalan a, “de facto, l’estatut de lenga nacionala”, al contrari de çò qu’es abitual dins la granda majoritat de las lengas minorizadas d’Euròpa.
 
Guus Extra, lo professor de l’Universitat de Tilburg qu’a dirigit la recèrca al nivèl europèu e n’a elaborat los resultats principals, a corroborat las impressions de Vila en assegurar que Catalonha se pòrta “fòrça plan” per çò qu’es del multilingüisme. Un fach “que se percep tot just en visitar Barcelona, e s’i ausís parlar de multiplas lengas per carrièras”, apondèt Extra.
 
 
L’educacion e los servicis socials, entre los ponches fòrts
 
Los resultats del rapòrt, a explicat Vila, mòstran que lo multilingüisme es plan notòri dins lo sistèma educatiu catalan. Aital, los escolans catalans intran en contacte amb l’anglés en essent mai joves que los escolans d’autres endreches coma los Païses Basses. Pasmens, lo professor de l’Universitat de Barcelona a soslinhat qu’en Catalonha “i a pauca experiéncia de l’ensenhament integrat de lenga e de contenguts en lengas estrangièras”, un aspècte que caldriá melhorar. Las universitats, amb 22 lengas prepausadas pels estudiants de carrièras non filologicas, son un autre “ponch fòrt” del multilingüisme en Catalonha.
 
Vila a vantat tanben los servicis socials municipals, pr’amor que “s’i emplega fòrça lengas”. Lo professor a mes l’exemple de Barcelona, ont los servicis socials fan usatge oral de qualques lengas coma lo chinés, l’amazigh, lo wolof o l’armèni.
 
 
Una lista d’aspèctes de melhorar
 
Ça que la, lo rapòrt soslinha tanben qu’en Catalonha i a de progrèsses de far. Vila a soslinhat que cal aténher dins l’escòla “un melhor rendement en lengas estrangièras”. Als mèdias, lor caldriá “sarrar mai los canals estrangièrs” de la grasilha televisiva locala, e dins l’encastre del trabalh, caldriá informar melhor los trabalhadors sus las ressorsas lingüisticas qu’an a posita. Egalament, l’estudi conclutz qu’a Catalonha li cal “aprofechar melhor las ressorsas lingüisticas de l’immigracion allofòna”, es a dire, aquela que parla de lengas que son pas las oficials dins lo lor país.
 
L’estudi es estat elaborat dins l’encastre del programa Language Rich Europe, un projècte europèu que vòl “partejar de coneissenças sus las bonas politicas e practicas en l’aprendissatge e l’ensenhament de las lengas en Euròpa tota”. Lo programa, començat en 2010, conclurà l’an que ven amb una conferéncia a Brussèlas: que servirà a presentar de recomandacions a las autoritats de l’Union Europèa sus la gestion del multilingüisme.
 
Mai d’informacions sul sit web del programa Language Rich Europe.
 




Aqueste article ven del jornal catalan Nationalia.cat, amb qui Jornalet a un acòrdi de cooperacion.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article