Bandièra01 1180x150: Comuna de Tolosa

Actualitats

Pau: la polícia ataquèt la Tor deu Borrèu per clavar la Fèsta de la Musica

Creson que l’accion policièra poiriá èsser premeditada per criminalizar l’esquèrra occitanista

| Franck Paillanave
Dissabte passat, 21 de junh, la fèsta de la Musica s’acabèt amb de susmautas davant La Tor deu Borrèu, al quartièr del Hedars, a Pau (Bearn). La sedença del movement d’esquèrra revolucionària occitana, Libertat, vegèt coma la polícia metiá fin als concèrts qu’aviá organizat d’una faiçon plan violenta.
 
Segon la version oficiala, la polícia demandèt d’arrestar los concèrts a 1 ora, e a 2 oras un trentenat de policièrs intervenguèron per metre fin a la fèsta en afrontant un centenat de personas que festejavan, e que lor lancèron de botelhas, de cadièras e de tròces de noiridura.
 
Mas segon la version de l’organizacion, de policièrs de divèrses còrses (municipala, nacionala, CRS e BAC) faguèron irrupcion quand lo darrièr grop acabava de jogar, en tustar lo material dels grops, en ensajant aital d’arturar la musica, e en lançant de gases lacrimogèns e de flashballs abans que lo mond reagiguèsson. Lo mond respondèron sul pic a l’agression e se descadenèt la violéncia. Almens 4 personas serián arrestadas.
 
Libertat denóncia de “provocacions policièras, [d’]atacs desmesurats e la volontat clara e afirmada de l’administracion de barrar lo [lor] lòc de luta e de cultura”. Del costat de las autoritats, dison que “l’arrèst municipal que fixa la fin dels concèrts a 1 ora foguèt pas respectat malgrat divèrsas demandas efectuadas als organizaires del concèrt”.
 
 
Libertat cèrca de testimònis per denonciar l’agression
 
La còla de la Tor deu Borrèu planh los destorbaments que los eveniments causèron als vesins, ja que lo gas lacrimogèn emplissiá tot lo quartièr e que quitament metèron en dangièr la santat d’un enfant asmatic de 3 ans, que dormissiá amb la fenèstra dobèrta.
 
Segon qualques testimoniatges, lo quartièr èra encerclat per mai d’un desenat de forgons de polícia a 1 ora, per tant, que creson que l’accion policièra poiriá èsser premeditada. De fach, la Tor deu Borrèu denóncia dempuèi 22 ans de provocacions policièras coma aquela, amb la tòca de criminalizar l’esquèrra occitanista e de barrar lo local.
 
A l’ora d’ara, Libertat e lo grop d’Accion Antifaissista de Pau cèrcan de far conéisser los faches e lançan una crida als testimoniatges, orals o escriches, e de fòtos o de vidèos, que se pòdon mandar per e-mail.
 
La Tor deu Borrèu es un local gerit pels sòcis, sens cap de subvencion, que dempuèi 22 ans s’implica dins la vida associativa, culturala e sociala del quartièr del Hedars, a Pau. E en collaboracion amb d’autras entitats socialas, fan d’activitats per far conéisser los problèmas socials e nacionals d’Occitània.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Burugorri Pau
11.

N'i a pas que Libertat que ha denonciat de “provocacions policièras, [d’]atacs desmesurats e la volontat clara e afirmada de l’administracion de barrar lo [lor] lòc de luta e de cultura”. I a l'Accion Antifascista de Pau tambén !

  • 1
  • 0
Ernèst Guevara Jr. L'Avana
10.

#9 Ni mai las bravas gents que i militan umanistament.

  • 2
  • 0
Pascau
9.

#8 Precision entaus qui ne coneishen pas Pau : lo Hedars qu'ei un quartièr "popular".
Sèi pas si los cònhos aurén agit atau dens un quartièr riche. Mes dens los quartièrs riches n'i a pas la tor deu borrèu.

  • 9
  • 0
Julian
8.

La Maison comuna ne pareish pas estar a l'origina de l'ataca, l'adjunta (Josy Poeyto) qu'èra totun presenta suu lòc e n'a pas agit. Qu'ei mei que mei lo prefecte, qui a dejà un conflict dab Libertat, qui sembla estar darrèr aqueth ahar. Las autoritats n'an jamei ensajat de contactar los organizators entà arestar la musica au contra de çò qu'anoncia la policia, que son arribat sus l'empont dab las matracas e las bombas lacrymo en man, impossible ad aqueth moment de parlar dab lo lor capdau. Mantuns vesins deu lòc que pensan de portar lo clam contra la policia. Ua mainada de 3 ans asmatica qui dromiva la finestra obèrta qu'a devut partir a l'espitau dens la nuèit! Aqueth ahar qu'ei politic, la responsa be dèu estar hòrta!

  • 15
  • 0
BOURDON Pau
7.

#4 Que n'i a sus Facebook. Lo ligam que's tròba sus un comentari a l'article de "La République des Pyrénées".

  • 1
  • 0

Escriu un comentari sus aqueste article