Bandièra01 1180x150: Comuna de Tolosa

Actualitats

crotz-tolosaCreated with Sketch.Comtat de NiçaCostiera Niçarda

Lo gendre d’Hélène Pastor comanditèt son assassinat

Wojciech Janowski, un òme d’afars polonés de 64 ans, maridat amb Sylvia Pastor e cònsol de Polonha a Mónegue, reconeguèt que lo mobil del crime foguèt “l’eiretatge”

Wojciech Janowski
Wojciech Janowski | Padasnieg
Sembla que l’enquèsta sus l’assassinat d’Hélène Pastor e de son menaire, Mohamed Darwich, es a mand d’èsser clavada. Lo gendre de la victima e cònsol de Polonha a Mónegue, Wojciech Janowski, a reconegut son implicacion dins l’atemptat que se passèt lo 6 de mai passat a Niça. Segon l’enquèsta, Janowski auriá comandat l’assassinat de sa sògra quand ela daissèt de versar a sa filha Sylvia los qualques 500 000 èuros de renda mesadièrs que fasiá normalament. El meteis reconeguèt que lo mobil del crime èra “l’eiretatge”.
 
Dimars passat, en una conferéncia de premsa, lo procuraire de Marselha, Brice Robin, faguèt un estat dels “flux financiers suspèctes” suls comptes de Janowski, que desirèt pas la preséncia d’un avocat pendent las 96 oras de gàrdia a vista. Janowski, un òme d’afars polonés de 64 ans, aviá pagat 200 000 èuros en liquid e de presents que lor valor es d’aperaquí 50 000 èuros, çò precisèt Robin. Atanben plaçada en gàrdia a vista “per lei besonhs de l’enquèsta”, Sylvia Pastor, de 54 ans, filha de la victima e esposa de Janowski, foguèt liberada dimècres passat sens cap de carga. Es “sota lo chòc”, segon Robin, “es tot un mond que s’escranca a l’entorn d’ela”. Dètz autras personas detengudas per aquel crime foguèron tanben liberadas.
 
A l’ora d’ara i a sèt personas detengudas. Al delà de Janowski, qu’auriá encargat l’assassinat, sièis personas de mai son en preson, dont l’entraïnaire esportiu de Janowski, Pascal Dauriac, que seriá “lo vertadier organizaire dau crime”, segon lo procuraire Robin. Los autres cinc serián dos executants, lo presumit tiraire “que refusèt de parlar” pendent l’enquèsta, lo complice “que reconeguèt lei fachs” e tres intermediaris.
 
Lo govèrn polonés retirèt dissabte passat la carga de cònsol onorari de Polonha a Janowski per “la pèrda de sa bona reputacion”. Janowski es un òme d’afars, director de la societat monegasca Firmus SAM, especializada en nanotecnologias.
 
Lo Principat de Mónegue es un país ont lo mond son acostumats a las manièras aristocraticas de las nombrosas celebritats que lai demòran. L’atemptat contra Hélène Pastor e son menaire foguèt una bomba de rumors demest los monegasques. Pasmens, la polícia poguèt parlar amb la victima quand èra espitalizada abans de morir, mas Hélène Pastor diguèt qu’aviá pas cap d’idèa suls mobils d’aquel atac.
 
Hélène Pastor fasiá partida d’una familha de las mai ricas del Principat de Mónegue, que possedís una enòrma part del patrimòni immobilièr del país. Son filh, Gildo Pallanco Pastor, lo que sa maire vesitèt a l’espital quand foguèt atacada, es lo president de Venturi Automobiles, lo constructor de veituras d’espòrt electricas. Lo fraire d’Hélène Pastor, èx-president del club de fotbòl AE Mónegue, que moriguèt en febrièr passat, èra un ric òme d’afars. 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
1.

Lèu fach e plan fach. Al mens, a Mónegue,an pas cercat de cargar lo crim sus l'esquina del jardinièr de l'ostal. Ja qu'es tan eficaça, l'equipa aquela deuriá tornar prene l'enquèsta per agantar los qu'assasinèron Na Marchal.

  • 3
  • 0

Escriu un comentari sus aqueste article