Bandièra01 1180x150: País Invisible

Actualitats

Los sièis procèsses judiciaris contra Sarkozy

| World Economic Forum
L’èx-president de la Republica Francesa, Nicolas Sarkozy, foguèt detengut dimars passat dins l’encastre de l’investigacion sus un afar de trafec d’influéncias que la mena lo parquet anticorrupcion. Dempuèi lo 26 de febrièr, Sarkozy es al centre de l’investigacion judiciària que tanben tracta d’un cas de violacion del secret d’instruccion.
 
Mas aquel afar de corrupcion es solament un dels sièis procèsses judiciaris que la justícia francesa a dobèrts contra l’èx-president.
 
 
L’afar Tapie
 
Es un dels mai delicats qu’afrontan Sarkozy e tanben l’èx-ministra de l’economia, Christine Lagarde. Los dos son estats meses en examen per de possiblas pressions sus un jutge per que favoriguèsse l’òme d’afars francés Bernard Tapie en son litigi contra la banca Crédit Lyonnais.
 
 
L’afar Karachi
 
Sarkozy es al còr d’aquela enquèsta sul pagament de comissions milionàrias per la venda de tres sosmarins a l’armada paquistanesa. L’argent ganhat amb aquelas comissions auriá, presumidament, finançat una campanha electorala de Sarkozy dins los ans 90.
 
 
 
L’afar Bettencourt
 
La justícia met en examen l’èx-president francés per abús de feblesa de Liliane Bettencourt, la nonagenària eiretièra de l’empèri cosmetic L’Oréal. Bettencourt a una deméncia mixta e una malautiá d’Alzheimer dins un estat moderadament sevèr. L’investigacion judiciària vòl esclarzir se Sarkozy profechèt de l’estat de la milionària e s’abusèt de la siá fisança per li traire d’argent destinat a finançar la campanha que lo menèt a l’Elisi en 2007.
 
 
D’afars escurs amb Muammar Al Qadhdhafi
 
Sarkozy a d’autres procèsses dobèrts amb la justícia, que dins un d’aqueles, se suspècta que l’èx-president de Libia, Muammar Al Qadhdhafi, auriá subvencionat tanben la campanha de 2007 amb cinquanta milions d’èuros.
 
 
Los sondatges irregulars
 
Sarkozy l’an tanben mes en examen per saber se, pendent son mandat, comandèt a nòu entrepresas de sondatges favorables a sos interèsses.
 
 
L’afar de las escotas telefonicas
 
Los investigators perseguisson un ret d’informators de la polícia e la justícia que, presumidament, filtrèron d’informacion a de familiars de l’èx-president francés dins las proceduras legalas que i es implicat. Per aquela investigacion, los policièrs sometèron a d’escotas telefonicas l’èx-cap d’estat a partir de setembre de 2013. E son aquelas escotas que revelèron que Sarkozy recebiá d’informacion subre las investigacions que l’implicavan. 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Emmanuèl Isopet
5.

Atencion, lo titol de l'article es enganaire : son pas 6 proceses contra Sarkozy! Dins totes aqueles afars lo nom de Zarkozy es citat, mas cal destriar quand es solament citat (pel moment), quand es mes en examen, e cresi que cal tirar aquel ont es oficialament disculpat :
1- L’afar Tapie : es l'afar que put lo mai, mas pel moment, l'ex-president es pas mes en causa (pas de mesa en examen).
2- L’afar Karachi : aqui tanben los collaborators mai proche de Sarkozy son citats, mas el es pas encara mes en examen.
3- L’afar Bettencourt : dins aquel afar Zarkozy beneficièt d'un "non-lieu", es a dire que aprèp la mesa en examen lo jutge estimèt que i avia pas de carga sufisenta per lo perseguir.
4- D’afars escurs amb Muammar Al Qadhdhafi : efectivament! Aqui Sarkozy es pas mes en exament, mas es el que portèt planh contra Mediapart que revelèt l'afar.
5- Los sondatges irregulars : aqui tanpauc, pas de mesa en examen.
6- L’afar de las escotas telefonicas : es l'afar mai recent que menèt a la mesa en examen e que se deuria puslèu apelar "l'afar del trafec d'influéncia", que las escotas son pas que lo mejan.

  • 3
  • 0
Ernèst Guevara Jr. L'Avana
4.

Quora s'opèran d'escurs afars coma aquestes, dins de païses mai paures, parlan de corrupcion. Aquò's un bèl exemple, non ? Mas ai qualques dificultats a imaginar qu'una corrupcion aital s'arrèste subte en cmabiant de partit politic liberal al cap d'un estat. Quora s'instaura la corrupcion, es un pauc coma amb la mafia, o amb lo càncer. N'aprendrem probablament mantas un còp lo govèrn actual el tanben passat a l'ast, coma aquò s'anóncia. E partegi l'ànsia del Bourdon sube aqueste sicut…

  • 5
  • 0
Jig Mimbasta
3.

#2 Òc-ben quiò malaja. E s'ac virèssi shens aute destorb, lhèu que seré péger pr'amor, alavetz, lo sentit d'impunitat que haré bèths domaus. Tau FN qu'ei ganhant-ganhaire.

  • 3
  • 0
BOURDON Pau
2.

Lo prumèr reflèxe qu'ei de s'arregaudir, mes dens un second temps que ns'avisam que las embracas
judiciàrias de Sarkozy ne pòden pas profieitar qu'au Front National, e aquò n'ei pas briga entà s'arregaudir.

  • 4
  • 0
Joan Francés Blanc
1.

Aquí, e non pas dins l'ultragaucha o lo separatisme fantasmats per la premsa servila (exagonala, neofranquista...) es la vertadièra criminalitat, la de la corrupcion e de l'impunitat. Lo rèire-president passèt son temps al poder a ensajar d'aflaquir l'independéncia del poder judiciari. Sembla qu'i capitèt pas plan.

  • 9
  • 0

Escriu un comentari sus aqueste article