Bandièra01 1180x150: Comuna de Tolosa

Actualitats

An elegit Juncker president de l’Union Europèa

Lo luxemborgés Jean-Claude Juncker, del Partit Popular Europèu, foguèt elegit ièr nòu president de la Comission Europèa amb 422 vòtes en favor e 250 contra. I aguèt tanben 47 abstencions e 10 vòtes nuls. Juncker recebèt lo sosten de la majoritat dels eurodeputats populars, socialistas e liberals europèus, que s’alièron per lo prepausar après los resultats electorals. Votèron contra los eurodeputats de l’esquèrra unitària, los conservators e los reformistas europèus, los conservators britanics e l’ultradrecha.
 
Juncker es lo primièr president de la Comission Europèa qu’arriba a la carga après èsser lo cap de la lista mai votada a las eleccions europèas, la del Partit Popular Europèu. A lo sosten de 26 dels 28 estats de l’union, es a dire de totes, levat d’Ongria e del Reialme Unit, qu’aqueste s’i opausèt frontalament perque considèra Jucker tròp federalista.
 
 
David Cameron a nomenat Philip Hammond ministre dels afars estrangièrs
 
Lo primièr ministre del Reialme Unit, David Cameron, mostrèt sul pic son oposicion a l’eleccion de Juncker en nomenant Philip Hammond ministre dels afars estrangièrs del govèrn britanic, un euroesceptic conegut que fins ara èra ministre de la defensa. Cameron a mes son òme dur als afars estrangièrs en tot ensajar de plaire al sector de son partit qu’es partisan de trencar los ligams amb l’Union Europèa e, tanben, perque vòl afrontar la menaça venent de la reüssida electorala dels eurosceptics al Reialme Unit, pendent las darrièras eleccions europèas del 25 de mai passat.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article