Bandièra01 1180x150: Comuna de Tolosa

Actualitats

crotz-tolosaCreated with Sketch.ProvençaProvençaPaís d'Ais

Gardana (Provença): una experiéncia d’installacion dei ròms

Dins l’estat francés, la situacion dei ròms pòrta polemica despuei quauqueis annadas. Per exemple, lo primier ministre Manuel Valls, lo 24 de setembre passat, diguèt que devián tornar en Romania pr’amor de sei “biais de viure extrèmament diferents” d’aquelei dei francés. Aquelei prepaus an encoleridas leis organizacions antiracistas, en particular lo MRAP (Movement còntra lo Racisme e per l’Amistat entre lei Pòbles) qu’a denonciat en justícia lo cap dau govèrn francés.

Mentre qu’a fòrça municipalitats, lei tempta lo desir d’expulsar lei ròms, la  vila de Gardana, entre Ais de Provença e Marselha, dirigida per lo cònsol comunista Rogier Meï, comencèt una experiéncia originala. Non se tracta pas d’estigmatizar ni de fòrabandir aquelei populacions, mai au contrari de leis installar, de cercar de leis integrar, amb l’ajuda financiera de l’estat francés e deis autrei collectivitats localas.

A l’entorn de l’ancian potz minier Z, recampèron au començament dotze familhas, uei 64 personas, amb un acompanhament municipau qu’implica la signatura d’una carta dei drechs e dei devers en escambi d’una ajuda atentiva per trobar un emplec e/ò un lotjament mai estable. Enebisson la mendicitat e obligan lei ròms d’escolarizar leis enfants. Totei lei familhas respèctan d’a fons la carta, e son tras que limitats lei cas de raubament, que sa consequéncia es l’expulsion dau terren de la comuna. La municipalitat velha de bailar de condicions de vida corrèctas a la populacion dau camp, e ansin chifra a la gestion dau curum.

Fòrça familhas quitan lo camp, tanlèu trobats un emplec ò un programa d’insercion, que pòt èsser europèu; i rèstan d’autras, ai qualas la vila de Gardana prepausa ara de lotjaments de dur. En junh de 2015 vòlon barrar lo camp e lotjar totei lei familhas dins divèrsei vilas dau departament dei Bocas dau Ròse. Maugrat l’ostilitat de l’FN, que poguèt pas empachar, pasmens, la reeleccion dau cònsol, lei gardanencs accèptan ben la companhiá dei ròms.
Aquela experiéncia d’installacion dei ròms, d’autrei vilas occitanas la seguiràn?
 
 
 
 
Gerard-Joan Barceló
 



 

Les Roms de Gardanne vivent en toute légalité...por francetvinfo

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Danís
3.

Una actitud umana planvenguda, l'acompanhament d'aquelas familhas. Mas seriá pas una vertadièra integracion a la franchimanda qu'es demandat per la municipalitat ? (enebit d'escupir, de bolegar en caravana e de parlar rom ?)

  • 0
  • 0
Ernèst Guevara Jr. L'Avana
2.

#1 E òc, Manú, una politica d'esquèrra, contràriament a la del governament actual !

  • 2
  • 0
Emmanuèl Isopet
1.

Politica intelligenta e planvenguta!

  • 6
  • 0

Escriu un comentari sus aqueste article