Bandièra01 1180x150: Comuna de Tolosa

Actualitats

Iran: libertat desvelada

Una pagina Facebook per que las femnas pòscan partejar de fotografias amb sa cabeladura al vent

| My Stealthy Freedom آزادی یواشکی زنان در ایران
Los que faguèron lo Còde Penal Islamic d’Iran tròban pas simpaticas las lesbianas:
 
— Article 127 del Còde Penal Islamic d’Iran. Lesbianisme vòl dire omosexualitat de las femnas pels genitals.
— Article 129. Lo puniment per lesbianisme es de 100 foetadas a caduna.
— Aricle 131. Se l’acte de lesbianisme s’es repetit tres còps e i a agut puniment a cada còp, la senténcia de mòrt se deurà formular lo quatren còp.
 
Los que faguèron lo Còde Penal Islamic d’Iran tròban pas simpaticas las dònas:
 
— Article 638. Quala que siá la persona que viòle explicitament quin que siá lo principi religiós en public, a mai d’èsser punida per la lei, deurà èsser tanben empresonada pendent un periòde entre 10 jorns e 2 meses, o deurà èsser foetada (74 foetadas). NÒTA: las femnas qu’apareisseràn en public sens l’hijab adequat deuràn èsser empresonadas pendent un periòde entre 10 jorns e 2 meses o pagar una emenda de 50 000-500 000 rials.
 
Un hijab adequat es lo que cobrís còrs, braces, cambas, cabeladura e còl.
 
500 000 rials son 14,19 èuros. Lo salari mensual mejan iranian es de 310 èuros.
 
La vida es dura per una femna iraniana, dins son quotidian, aquestes jorns, amb aquesta calorassa. Aquestes jorns a Teheran la temperatura mejana a miègjorn èra de 39 ºC, mas la sensacion termica èra de 42-43 ºC.
 
L’escrivana e jornalista iraniana mas establida en Londres, Masih Alinejad, se deguèt dire benlèu qu’en Iran, a las femnas, lor vendriá pas gaire l’enveja de s’envolopar lo cap amb un mocador; e creèt una pagina en Facebook, My Stealthy Freedom آزادییواشکیزناندرایران(Ma libertat furtiva), per que la femna que volguèsse poguèsse partejar de fotografias amb sa cabeladura al vent, per dire de poder testimoniar son enveja de libertat e amb aquò de testimoniar son delicte.
 
E de centenats e centenats de femnas iranianas que demòran en Iran an mandat sas fotografias, d’unas veladament (sens vel, mas mostrant son copet), d’autras mostrant son visatge, al mesprètz de çò que van dire e al mesprètz del dangièr, amb fiertat. Uèi lo jorn, mai de 500 000 personas an mostrat son sosten a aquela pagina. E la chifra es a créisser.
 
“En Iran la vida d’una femna val legalament la mitat de la vida d’un òme, pòdon pas decidir d’esperelas se vòlon divorciar...”, ditz la lei, e o fa remembrar a cada còp l’avocata iraniana Shirin Ibadi, Prèmi Nobel de la Patz en 2003.
 
Accion pòrta a reaccion. I a certanas femnas que s’esfòrçan per que las causas cambièsson, e i a un poder gerit per d’òmes que s’esperfòrça per que las causas càmbien pas. O que viren a pièger.
 
En setembre de 2012, 36 universitats iranianas interdiguèron l’accès a las femnas a 77 estudis universitaris, dont l’arqueologia, l’engenhariá informatica, la filologia anglesa, la traduccion de l’anglés, l’ostalariá, la fisica nucleara, l’engenhariá electrica, l’engenhariá industriala... Las femnas iranianas d’uèi son clarament mai cultivadas que los òmes, e lo govèrn de la Republica d’Iran tròba qu’aquò es un problèma.
 
Dins la Republica Islamica d’Iran las mitats d’òmes son ja lo 52% de l’ensems dels estudiants universitaris graduats. E lo 68% dins la carrièras de sciéncias.
 
Dins Ma libertat furtiva tanben i a qualque bèstia que manifèsta son desacòrdi: “seriá plan que foguèsses violada davant ton filh”, “vas morir lèu”...
 
La violéncia es totjorn estada l’argument d’aqueles qu’an pas d’arguments. Fòrça gents en Iran an pas paur de mostrar qu’aquò es pas un argument valable.
 
 
 
 
Manèl Zabala

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Abó Bakhr Zaragòssa la Blanca
2.

A las religions del libre, l'omosexualitat a totjorn pausat un problèma.S'ajustam que lo patriarcat exigís que los enfants dun ostal sián absoludament los enfants del cap masle de familha, aquí, m'as comprés, las femnas pòdon sonque patir, e patir encara, e encara… Aquelas religions an una páur panica (etimologicament !) del plaser, mai que mai sexual, estant que, çò dison, al moment del plaser sexual pòdon pas ni un òme ni una femna pensar a Dieu. Lo solet moment que s'i pòsca pas pensar es aqueste moment, estant qu'es un moment plan natural de non-pensar — çò que, a mon umil punt de vista, contribuís per plan mai qu'un pauc a la sensacion de plaser.

Alavètz, practicar la sexualitat dins un contèxte mestrejat e dins la finalitat parturativa e multiplicativa, aquò rai. O nos podèm permetre.

Mas dos òmes o doás femnas que s'aman, (siá en passant, siá apasionadament) perqué fan l'amor ? Per se reproduïre ? Riscas pas res ! O fan manifèstament pel plaser, e sonque pel plaser d'o far.

Me diràs, mon bon Manèl, los autres tanben ! E m'i acordarai amb tu ! Mas… al mens, dins lo cadre del maridatge, las aparéncias ipocritas del moralisme religiós son salvadas : « Crecatz e multiplcatz ! » Mentre qu'en defòra, en vegièrs o dins cambra, o entre gents del meteis genre, caucanha : sonque lo plaser, sonque lo Jòi !!!! E rai se n'oblidam Dieu. Après tot, segon la definicion, Dieu es çò melhor. E coneisses quicòm de melhor que de far l'amor, Manèl ?

Concluissi del tieu article que lo sol problèma iranian es pas l'omosexualitat, ni la sexualitat desliurada. Lo problèma es la manca de laïcitat d'un poder politic quin que siá. Amen…

  • 6
  • 1
Ernèst Guevara Jr. L'Avana
1.

Las femnas iranianas d’uèi son clarament mai cultivadas que los òmes, e lo govèrn de la Republica d’Iran tròba qu’aquò es un problèma. Mas lo solet problèma, aquò es la quita Republica Islamica d'Iran.

  • 5
  • 0

Escriu un comentari sus aqueste article