Bandièra01 1180x150: Comuna de Tolosa

Actualitats

Cossí seriá lo Reialme Unit sens Escòcia?

La mapa politica, economica e demografica cambiariá fòrça

Lo Reialme Unit poiriá cambiar considerablament se los escoceses votèsson favorablament per l’independéncia de lor país lo 18 de setembre que ven e s’Escòcia venguèsse un estat independent. Un dels cambiaments mai visibles seriá la modificacion geografica. Lo Reialme Unit perdriá lo 32% del territòri e passariá a aver una superfícia similara a las de Tunisia o Grècia, segon çò qu’explica la BBC dins un article que ditz que la pèrda del percentatge de populacion seriá, totun, solament del 8%.
 
La pèrda del territòri escocés fariá aumentar considerablament la densitat de populacion del Reialme Unit, que passariá d’èsser lo 45n país amb mai d’abitants per quilomètre cairat a ocupar la 29a posicion.
 
 
De pèrdas economicas
 
Los efièches economics de l’independéncia son de mal preveire mas, en partissent de la situacion actuala, la desaparicion de las contribucions escocessas reduiriá del 7,7% lo produch interior brut del Reialme Unit. Aquò vòl dire 282,5 liuras esterlinas per anglés de mens cada an, se prenèm en compte las donadas del PIB de 2012. Sens Escòcia, las exportacions britanicas davalarián del 7,1%, qu’es lo percentatge escocés actual del comèrci a l’estrange.
 
 
Un nòu dessenh de Westminster
 
La mapa politica del Reialme Unit seriá tanben desparièra. Los 59 sètis escocesses del parlament actual desapareisserián e aquò portariá de cambiaments significatius a Westminster. Se se pren los resultats electorals de 2010 e se se’n lèva los deputats elegits en Escòcia, lo partit conservator de David Cameron tendriá la majoritat e perdriá solament un deputat. Per contra, lo partit trabalhista ne perdriá 41 e los liberals democratas, 11.
 
 
Mai d’ans de vida pels angleses
 
L’esperança de vida dels escoceses es un pauc pus bassa que la de la rèsta del Reialme Unit. S’Escòcia venguèsse un estat independent, la longevitat dels angleses creisseriá un pauc segon las estatisticas. La vida mejana dels òmes del Reialme Unit aumentariá de 2,5 ans e la de las femnas de 2,1. 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

fabre murèth
3.

M'estòni tot aquò vist que los escossèsses tenon mai de 90% de las ressorgas del petròli.
Cameron va manjar de grabèls . Li desiram un bona salça .
Angleses defòra .....

  • 4
  • 7
BOURDON Pau
2.

#1 Qu'avetz rason. Visca l'Anglatèrra independenta :-)

  • 7
  • 0
William Wallace
1.

Cossí seriá lo reialme d'Anglatèrra, sens sens Irlanda, Gàlias, Cornoalhas eni Escòcia ? Seriá anglés, ni mai ni mens.

  • 12
  • 0

Escriu un comentari sus aqueste article