Una peleja plan violenta se passèt dissabte a Ròcamaura (Garrigas) entre 19h e 23h en afrontant dins las carrièras de la petita vila doas bandas rivalas de Ròcamaura e d’Aurenja (Comtat Venaicin), qu’es a un desenat de quilomètres. “L’altercacion aviá un motiu privat, futil probable, subrevengut la velha, e que s’es convertit l’endeman”, çò precisèt la prefectura.
 
Los afrontaments provoquèron un total de uèch ferits. Los pelejaires empleguèron de barras de fèrre de d’armas blancas. De testimònis an raportat d’aver entendut un cop de fuòc, mas cap de bala ni de dolha es pas estada trobada.
 
Segon çò que rapòrta l’AFP, extrach d’un testimoniatge que vòl gardar l’anonimat, una gojata de Ròcamaura seriá estat “violentament insultada” per un jove del quartièr de La Forca Vielha d’Aurenja. En seguida apareguèron un quarantenat de joves aurengencs en veitura perseguits per un trentenat de joves locals. La perseguida automobilistica damatgèt 4 veituras. Segon aquel testimoniatge, esperèron dimenge per las represalhas. Segon la prefectura, dos veïculs foguèron reversats al centre vila, del temps que los dos autres veïculs apertenon als belligerants.