Bandièra01 1180x150: Comuna de Tolosa

Actualitats

Demostracion de fòrça de l’independentisme en Nòva Caledònia e Martinica

| caledosphere.com/
Lo canac Djaïwé es lo candidat mai votat dins la segonda circonscripcion caledoniana e se jogarà lo sèti contra la drecha unionista. Los independentistas martiniqueses an l’avantatge en dos districtes. La protèsta contra lo còst de la vida balha de vam al sindicalista Boinali Said Toumbou a Maiòta
 
 
Victòria momentanèa de l’independentisme canac
 
En Nòva Caledònia, ont se causís dos deputats, l’independentista Jean-Pierre Djaïwé a fach istòria en venir lo candidat mai votat dins la segonda circonscripcion d’aquel territòri oceanic. Djaïwé es lo candidat unitari de tot lo blòc independentista canac. Amb 36,2% dels vòtes, lo segond torn serà pas aisit per el: i aurà solament un candidat opausat, lo drechan Philippe Gomas (33%), qu’amassarà aital tot lo vòte antiindependentista. Caldrà veire quantes independentistas, qu’al primièr torn son pas anats a las urnas, o faràn al segond per sosténer Djaïwé.
 
 
Fortalesa dels partits independentistas e autonomistas en Martinica
 
En Martinica, dos membres del Movement Independentista Martiniqués (MIM) son estats los mai votats dins doas circonscripcions sus quatre d’aquela illa de la Mar Cariba: dins la primièra circonscripcion, Alfred-Marie Jeanne (28,5%), èx-president de Martinica, e dins la quatrena, Jean-Philippe Nilor (39,8%), qu’a un avantatge enòrme per venir deputat al segond torn.
 
Dins la tresena, Serge Letchimy (de l’autonomista Partit Progressista Martiniqués, PPM) a atengut 63,3% dels vòtes e al segond torn deurà afrontar, amb un grand avantatge, l’independentista Francis Carole (19,3%). E dins la segonda circonscripcion, i aurà duèl entre Bruno Nestor Azerot (de l’autonomista Rassemblament Democratic per Martinica) e Luc-Louison Clémenté, pròche del PPM.
 
 
Lo representant dels movements socials, al segond torn a Maiòta
 
I a tanben de novetats interessantas a Maiòta, l’illa de l’Ocean Indian qu’en 2009 votèt en referendum per estrénher los ligams amb París en tot venir departament d’otramar. En octòbre passat, l’illa visquèt d’incidents violents pr’amor de las protèstas dels mai paures contra lo còst de la vida. D’aquel movement ne sortiguèt la candidatura del cap sindical Boinali Said Toumbou, qu’a atengut 19,1% dels vòtes dins la primièra circonscripcion de l’illa e, per aver un sèti a l’Assemblada Nacionala francesa, afrontarà Saïd Omar Oili, èx-president de Maiòta e cap del partit Néma, favorable a la mantenença de Maiòta dins França.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article