Danemarc a fach un pas de mai en la comparason dels dreches dels ciutadans. Dempuèi divendres passat, son legals los maridatges de parelhs del meteis sèxe dins las glèisas luterianas. Lo parlament danés aprovèt la setmana passada la lei qu’assegura aquel drech per 85 vòtes favorables e 24 de contraris.
 
Danemarc foguèt ja lo primièr estat del mond que reconeguèt las unions civilas entre parelhs omosexuals en 1989.
 
Pr’amor qu’en Danemarc i a pas de separacion entre la glèisa e l’estat, lo parlament a pogut legiferar sus una question de portada religiosa. Ça que la, la lei permet que los pastors de la Glèisa Nacionala Luteriana ajan lo drech de refusar de maridar un parelh del meteis sèxe se considèran qu’aquel fach es contra la lor consciéncia. En aquel cas, l’evesque deurà designar un pastor substitut per ne far la ceremònia.
 
“Es fòrça important de balhar a totes los membres de la glèisa la possibilitat de se maridar”, a dich lo ministre de l’Egalitat e dels Afars Religioses, Manu Sareen.