Bandièra01 1180x150: País Invisible

Actualitats

Castells catalans en Bearn

| Montse Torres - Arxiu dels Castellers de la Vila de Gràcia
Dissabte passat, 2 d’agost, la vila bearnesa d’Arudi que vegèc las soas carrèras ocupadas per la preséncia d’aperaquí 160 castellers de la còla de la Vila de Gràcia, un quartièr de Barcelona. L’arrason de la lor preséncia en la Vath d’Aussau qu’èra la celebracion de la hèsta que cada annada organizan los pairs e las mairs de la Calandreta deu Lis, entà har conéisher la lor activitat aus aussalés.
 
Los castellers que participèren a un passacarrèra per las carrèras d’Arudi de matin; de ser que hèren ua mòstra de castells suu terren de rugbi que vegèt que las soas grasas e s’emplissián dab la preséncia d’aperaquí 1300 espectators ahuegats.
 
Segon la còla catalana, e tanben segon la Calandreta aussalesa, l’experiéncia que despassèc las espèras e cresen que hens l’aviéner e cau repetir l’experiéncia. Lo viatge dels Castellers de la Vila de Gràcia (CVG) en Bearn qu’ei lo resultat de 3 annadas d’esfòrç e negociacions de las duas parts.
 
Los castellers son aqueths que hèn castells, qu’en catalan e vòu díser “castèths”. Qu’ei ua manifestacion culturau de Catalonha que consistís a bastir construccions umanas de quate dinc a dètz estatges d’ua manèra e organizacion plan definidas. Cada còla que s’arreconeish per la color de la soa camisa, los de Gràcia son abilhats de blau. Los pantalons que son tostemps blancs.
 
En Arudi, la còla de Gràcia que hèc de matin lo pilar de 4 caminat (quate personas ua sus l’auta, en caminant), un 4 de 6 (sheis estatges de quate personas) e un 3 de 7 (sèt estatges de tres personas). De ser que bastiguèren un 5 de 6, un 3 de 7, un 4 de 7 dab un pilar demieg, un pilar de 5 e un pilar de 4 levat per baish.
 
 
 
 
Jordi Ràfols


_____
Las fòtos

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jòrdi Barcelona
5.

Los aussalés qu'an avut tanben l'oportunitat de véder au cinema d'Arudi, a la debuta de julhet, lo filme documentau Enxaneta.
Aici lo "teaser".
https://www.youtube.com/watch?v=hutjxGnpaRc

  • 1
  • 0
Alan Roch
4.

Document de gaitar :
http://vimeo.com/29500445

  • 1
  • 0
Víctor Capdet Vilanova i la Geltrú (Catalonha)
3.

I a de castells a Chile e quitament a la China. Occitània es mai près de Catalonha!

  • 1
  • 0
Cristian FORMENT AGEN
2.

O es pas que menjam de coscós?

  • 0
  • 0
Cristian FORMENT AGEN
1.

Nos o podriam jogar sul primèr parçan occitan volut a s'aviar dins l'edificacion de castells.

  • 0
  • 0

Escriu un comentari sus aqueste article