La justícia de Cambòtja ven de condemnar a perpetuitat dos dels principals caps dels khmers roges encara vius, Nuon Chea, d’88 ans, e Khieu Samphan, d’83 ans. La justícia cambotjana los condemèt ièr de matin per de crimes contra l’umanitat, en seguida de las orrors comesas pendent la dictatura de Pol Pot, qu’assassinèt aperaquí dos milions de personas entre 1975 e 1979. Noun Chea èra un dels principals ideològs e lo numèro dos del regim, del temps que Khieu Sampahan foguèt cap d’estat de Cambòtja.
 
Los dos condemnats, qu’escotèron impassibles lo verdicte, refusèron las imputacions e an previst de presentar un recors contra la senténcia e de demandar l’invalidacion dels jutges.
 
La cort aviá decidit de devesir lo procès contra los dos caps a causa de la complexitat del procès e de paur que los acusats, que son ja vièlhs, moriguèsson abans que se diguèsse la senténcia.
 
La setmana passada se passèt la segonda partida, que los acusats i èran declarats colpables de crimes contra l’umanitat e de genocidi. Se jutjava l’evacuacion forçada de la vila de Phnompenh e la deportacion de la populacion urbana vèrs de camps de trabalh de las zònas ruralas. Los acusats justifiquèron aquela evacuacion pel risc de bombardaments dels Estats Units e per la manca de noiridura.