"Dab un atacant, ei mei aisit de ganhar una partida de fotbòl". Ei çò qu'aurem podut har remarcar ger ser a Vicente Del Bosque. Après un prumèr encontre jogat shens nat atacant de formacion, lo seleccionaire espanhòu s'ei decidit ger a alinhar Fernando Torres, quitament se n'a pas retrobat lo nivèu qu'avè quauques temps a. Jòga ganhanta puish que Torres a pas esperat cinc minutas de jòc contra los irlandés per golejar. Mes lo praube guardian Given avè pas vist ren enqüèra. Rassegurada de menar.

Espanha a longtemps monopolizat la bala en aquera partida e maugrat una equipa d'Irlanda valorosa, après la pausa David Silva dobla l'escòre per Espanha. Los irlandés seràn pas viengut per ren ad aqueth Euro, auràn après que cau pas deishar un jogaire advèrsa sol tirar a cinq mètras de las caujas … En seguir lo campion d'Euròpa en títol a desvelopar tranquilament son jòc, Torres puish Fàbregas an marcat per una victòria nèta 4 a 0. Pas pro per descoratjar los suportaires irlandés qui après la fin de la partida, contunhavan de cantar a la glòria de lor equipa.


Itàlia e Croàcia se neutralizan

En cinc encontres, Croàcia avè pas jamèi perdut contra Itàlia, serà pas per aqueste còp. Son los italians qui los prumèrs se son creats ocasions de gol, notadament per Balotelli, l'atacant de Manchester City qui semblava totun tocat epsicologicament per sa prumèra partida mancada contra Espanha. Incapable d'estar decisiu, Itàlia a devut comptar sus una valor segura de la Squadra, Andrea Pirlo, qui dab un remirable còp franc a obèrt l'escòre un pauc abans la pausa. Pirlo confirma qu'a 33 ans, ei tostemps en bona fòrma, per pròva lo títol de campion qu'a ganhat augan dab la Juve.

En tornar deus vestiaris, profietant d'una ataca italiana un pauc brolhona, los croates an accelerat lo jòc e après mantuna occasion, an egalizat per Mandzukic. Un gol qui motivava Croàcia a anar cercar la qualificacion. Urosament per los italians, pòden comptar sus una bona defensa e sus Gigi Buffon per lmitar lo domau. Dab aqueth escòre finau de 1 pertot, Croàcia dab 4 punts pòt envisatjar los quarts de finala quitament s'ei autant problabla una qualificacion d'Itàlia. Se la Squadra Azzura l'empòrta contra Irlanda qu'ei ja eliminada e qu'Espanha bat Croacia, los italians demoraràn en la competicion.




Matieu Casanòva