Bandièra01 1180x150: Comuna de Tolosa

Actualitats

Lo nòu govèrn de Valls remplaça los tres ministres critics amb sas politicas economicas

Lo primièr ministre francés Manuel Valls presentèt diluns la demission en blòc del govèrn al president de la republica, François Hollande, per fòrabandir los ministres critics amb sa politica de reduccions budgetàrias e d’austeritat economica. L’endeman, Valls presentèt un nòu gabinet de ministres en acòrdi amb sa politica. Los tres ministres critics, Arnaud Montebourg (economia), Benoît Hamon (educacion) e Aurélie Filippetti (cultura), faràn pas pus partida del nòu conselh francés dels ministres.
 
 
Un èx-director de la banca Rothschild a l’economia
 
La plaça de Montebourg coma ministre de l’economia, la pren Emmanuel Macron, que fins ara èra lo secretari adjonch a la presidéncia. Es de soslinhar que Macron foguèt director de la banca d’afars Rothschild de 2008 fins a 2012. A 36 ans, Macron es a l’origina de las politicas d’austeritat del govèrn francés, mai que mai del dich “pache de responsabilitat” que prevei de reduire 50 miliards d’èuros dins los 3 ans venents. Aquel “pache” redutz los impòstes als entrepreneires per qu’engatgen mai de salariats.
 
 
De femnas fidèlas a Hollande a l’educacion e a la cultura
 
La plaça d’Hamon la prendrà Najat Vallaud-Belkacem, fins ara responsabla dels dreches de las femnas. Tanben a 36 ans e ven la primièra femna de l’istòria de França qu’es ministra de l’educacion. Es fidèla a Hollande e fa partida de l’executiu francés dempuèi son arribada a l’Elisi, ont a quitament aumentat son influéncia. Comencèt coma secretària d’estat e pòrtavotz del govèrn; puèi la nomenèron ministra dels dreches de las femnas, de l’urbanisme, de la joventut e dels espòrts dins lo govèrn precedent de Valls, sortit de la desfacha socialista a las eleccions municipalas. Ara pren en carga un dels ministèris mai importants de la republica, a qualques jorns de la rintrada escolara.
 
Lo tresen ministre critic, la ministra de la cultura Aurélie Filippetti, es remplaçada per Fleur Pellerin, qu’èra fins ara la secretària d’estat del torisme. A 40 ans, Pellerin es tanben dins l’executiu dempuèi la victòria d’Hollande en 2012 e tanben son influéncia a pojat. Pren la plaça de Filipetti que renoncièt a contunhar dins lo govèrn de Valls, malcontenta de sas politicas economicas.
 
 
De peses pesants
 
Valls ten dins lo govèrn qualques peses pesants, coma Laurent Fabius al ministèri dels afars exteriors, Ségolène Royal al de l’ecologia e Christiane Taubira al de la justícia. De Taubira cal soslinhar que s’èra solidarizada amb los ministres critics. Ela manten sa plaça dins un ministèri qu’aviá desvolopat la lei del maridatge per totes.
 
 
Un  govèrn sens cap d’ecologista
 
Lo nòu govèrn de Valls compta pas amb cap de representant d’Euròpa Ecologia-Los Verds (EELV), e mai s’aviá de negociacions amb aquel partit. Per contra, ten tres membres del PRG (Partit Radical d'Esquèrra, centresquèrra), qu’amb sos 12 deputats a l’Assemblada Nacionala (o los 17 de tot lo grop parlamentari de centresquèrra) es necite per sosténer lo govèrn, mai que mai a l’ora d’ara, que quitament qualques socialistas son critics amb sas politicas.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

BOURDON Pau
8.

L'esquèrra qu'ei de dreta, adara qu'ei oficiau.

  • 5
  • 2
Ernest Guevara Jr. L'Avana
7.

I es indicat : « La plaça de Montebourg coma ministre de l’economia, la pren Emmanuel Macron, que fins ara èra lo secretari adjonch a la presidéncia. Es de soslinhar que Macron foguèt director de la banca d’afars Rothschild de 2008 fins a 2012. A 36 ans, Macron es a l’origina de las politicas d’austeritat del govèrn francés, mai que mai del dich “pache de responsabilitat” que prevei de reduire 50 miliards d’èuros dins los 3 ans venents. Aquel “pache” redutz los impòstes als entrepreneires per qu’engatgen mai de salariats. » S'aquò's pas de liberalisme de dreita, qu'es aquò ? Qu'auriái fait, aquí meteis un governament Fillon ? 60 miliards en plaça de 50 ? Quina oposicion radicala !!!

  • 10
  • 1
Ernest Guevara Jr. L'Avana
6.

Los tres ministres ancians critics son los solets que se remembravan mai o mens aproximativament çò que "socialisme" vòl dire. E mai se non tornavan metre en causa lo productivisme ni lo consumerisme que li es indefectiblament ligat, al mens gardavan en consciéncia qu'un argumentari efectivament socialista se deu de manténer en amira lo demesiment de las inegalitats socialas e culturalas. Quora un partit cerca quitament pas mai a se remembrar d'aquò, a pas pus democraticament lo dreit de se pretendre socialista. Lo governament actual de l'estat francés es financiarista, productivista e consumerista, avantatja los afars de las entrepresas privadas e trepeja los dreits socials e los servicis publics. Donc, es un governament de dreita, elegit majoritàriament per de pòbles que los avián causits a dreita (Cf. "Mon ennemi, c'est la finance…"). Lo governamment de Valls, e sas orientacions economicas, dins aquelas condicions, es un escupit sacat a la cara de la quita nocion de democracia.

  • 8
  • 1
Redaccion Barcelona
5.

Error rectificada. Grandmercé!

  • 7
  • 0
Felip Martèl Montpelhier
4.

#3 Los radicaus "de gaucha..."

  • 3
  • 2

Escriu un comentari sus aqueste article