Bandièra01 1180x150: Comuna de Tolosa

Actualitats

Cridan a far una marcha per la reünificacion de Bretanha “amb cinc còps mai de manifestants”

| 7Seizh

De partits e d’associacions vòlon mostrar als parlamentaris franceses lo sosten al retorn del Léger Atlantic en Bretanha. Lo Senat repren aquesta tardor que ven los debats sus la reorganizacion territoriala de França. Los presidents de las regions s’opausan al govèrn per las datas de las eleccions regionalas que venon.


Las associacions e los partits favorables a la  reünificacion de Bretanha vòlon metre la question dins l’agenda dels deputats e dels senators de la Republica Francesa que, aquesta tardor, lor cal reprene los debats —en començant pel Senat— sus la reorganizacion territoriala de l’estat. Una reorganizacion qu’es fòrça controvertida, non solament en Bretanha mas tanben en Alsàcia, en Catalonha Nòrd e en Savòia.
 
Es aital que, pel tresen còp aqueste 2014, d’entitats e de partits convòcan los bretons a Nantas lo 27 de setembre per reclamar una Bretanha reünificada. Es a dire, amb lo departament del Léger Atlantic —qu’a l’ora d’ara aperten a la region del Païses de Léger— tornant en Bretanha. Coma d’abitud, las organizacions Bretanha Unida e 44=Breizh e los partits Union Democratica Bretona e Partit Breton convòcan a una manifestacion que demandan que se faga “amb cinc còps mai de manifestants” qu’en las escasenças precedentas. Aquò mòstra que los convocants vòlon redoblar la pression suls parlamentaris.
 
Al delà, an jonch tanben la crida d’autras entitats del país, coma la coordinacion culturala associativa de Bretanha, Kevre Breizh, amb 50 000 sòcis. Kevre Breizh jonguèt tanben la convocacion precedenta, en un moment que la coordinacion soslinhava la coeréncia de reclamar una Bretanha reünificada, e a l’encòp demandava als deputats franceses lo transferiment a las institucions bretonas de las competéncias en matèria de cultura, educacion, lenga, espòrts, desvolopament economic e social.
 
 
Tanben un problèma de datas
 
E al costat dels malcontentaments qu’a generat la proposicion del govèrn francés per reorganizar la mapa territoriala, l’executiu que dirigís Manuel Valls se tròba en un autre embolh, en aquel cas de datas. Las eleccions regionalas se devon far en 2015, e lo govèrn vòl que se fagan abans l’estiu per las far coïncidir amb las departamentalas. Mas la majoritat dels presidents de regions o accèptan pas: afirman que las nòvas regions fusionadas —que son previstas sus la mapa prepausada pel govèrn— seràn pas alestidas per trabalhar de manièra conjoncha abans la fin de 2015 e que, doncas, las eleccions se devon pas far en junh. Lo govèrn admet, quitament, que lo Conselh Constitucional “a de resèrvas” sul projècte, çò escriu La Tribune.
 
 
 
 
 
Aquesta nòva es adaptada del jornal catalan Nationalia, amb qui Jornalet a un acòrdi de cooperacion.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article