Coma d’autras personalitats, lo prince Albèrt de Mónegue, lo sol cap d’estat d’Occitània, a relevat l’escomesa de l’Ice Bucket Challenge. En seguida de se getar l’aiga glaçada dessús, lo prince monegasc a lançat l’escomesa al president francés François Hollande, al prince Haakon de Norvègia e a Philip Knigh, lo cap de la societat Nike. “Sio ben aürós e fièr de prene part a aqueste projècte extraordinari, e serai aürós de far personalament un don a LSA”, çò diguèt lo prince sobeiran.
 
L’Ice Bucket Challenge, qu’en anglés vòl dire l’escomesa del ferrat de glaç, es una campanha publicitària solidària qu’ensaja de conscientizar sus l’escleròsi laterala amiotrofica, coneguda coma malautiá de Charcot o malautiá de Lou Gehrig, e vòl promòure los dons per la recèrca d’aquela malautiá degenerativa progressiva qu’ataca las neurònas motrises. L’escomesa desfisa los participants d’èsser enregistrats en vidèo pendent que se gètan un ferrat d’aiga glaçada sul cap, e en seguida devon lançar l’escomesa a un maxim de tres personatges famoses per far la meteissa causa. Aquelas personas auràn 24 oras per o far. La persona qu’o fa deu tanben far un don a una associacion caritativa.