Bandièra01 1180x150: Comuna de Tolosa

Actualitats

Rajoy ditz ara qu'eth sauvament bancari ei "terriblement nociu"

Mens de dètz dies dempús de díder qu'eth sauvement europèu ère "fòrça bon", eth president deth govèrn espanhòu Mariano Rajoy didèc qu'ère "terriblement nociu". Qu'ac hèc agèr ena amasada deth G-20 en Mexic.


Rajoy qu'arreconeishie que damb eth sauvament europèu dera banca, eth deute sobiran sofrís problèmes, segontes a informat era agéncia EFE. Eth president espanhòu que hège referéncia ara pression des mercats, çò que provoquèc que deluns era prima de risc artenhèsse era chifra recòrd de 585 punts. Justaments agèr er estat que poguèc plaçar 3000 milions d'èuros en letres a 12 e a 18 mesi, mès qu'ac hèc en tot pagar un interès fòrça anautit, de 5,2% e de 5,3% respectivaments. 
 
Eth govèrn espanhòu volie qu'eth sauvament europèu balhèsse es sòs dirèctaments enes banques sense implicar-i er estat, çò que non s'ei cap debanat atau, mès que mès pera oposicion d'Alemanha.
 
En aguest sens que s'exprimic tanben eth president dera Comission Europèa, José Manuel Durão Barroso, que diguèc qu'era UE cerque de "favorir un sistèma qu'evite era contaminacion deth deute sobiran per part deth deute financèr". Sus eth sauvament a Espanha, Barroso non vò dar cap de detalh enquia qu'er estat "formalize era sua peticion". Alavetz, "se daurirà ua convèrsa damb es estats dera UE entà decidir quina ei era melhora manèra de hè'c".
 
Rajoy demanèc que se trinque era relacion entre eth risc bancari e eth deute der estat, ath delà de persutar que i age un calendari precís entà auançar entara union fiscau e bancària, qu'aurie d'includir un solet inspector, un hons de gatge de depausi comun e un mecanisme que permete reestructurar es entitats financères.
 
En miei dera crisi deth deute espanhòu era Comission Europèa a insistit qu'eth govèrn espanhòu a de persutar enes ajustaments, reduccions budgetàries e reformes estructuraus, sustot en sector bancari. Brusselles qu'atribuís era pression sus eth deute espanhòu ara "nerviositat e ara fatiga" des investisseires pera durada dera crisi, mès sustot ara incertitud sus eth sauvament bancari de 100 000 milions, qu'encara non ei estat precisat.




Ferriòl Macip

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article