Bandièra01 1180x150: Comuna de Tolosa

Actualitats

A la taula occitana

De ligams entre alimentacion, gastronomia e cultura occitana

En aqueste mes d’octòbre, dos rendètz-vos audencs faràn la part bèla als produits dels terradors occitans e als ligams entre alimentacion, gastronomia e cultura occitana.


L’alimentacion, miralh de las societats
 
L’associacion dels Companhs de Paratge consagrarà sa jornada annuala de reflexion (dobèrta a totes) a l’alimentacion e a la noiridura. Se tendrà lo dissabte 4 d’octòbre en Lauragués, al Mas Santas Puèlas.
 
Se noirir es plan mai qu’un acte de cada jorn, vist que mena a se pausar unas questions istoricas, economicas, ecologicas, etnologicas e, se ne vira, ideologicas. Mercé als intervenents, tres agaches espepissaràn “L’alimentation, miralh de las societats” e alimentaràn la discussion:
 
— La cosina et l’istòria amb las intervencions de Joan Vaquer (Cosina e preïstòria) e d’Ànnia Cazanava que nos farà assetar a la taula de Gaston Fèbus.
 
— La cosina occitana presentada per Mirèlha Braç e sostenguda per un retrait del grand cosinièr lengadocian Prospèr Montagné, qu’escriguèt Le festin occitan.
 
— Las questions d’actualitat amb Aurelian Chaire, plan conegut dels legeires del Jornalet, que tornarà sus la cosina senegalesa fàcia a la mondializacion e amb l’Estève Linou, precursor dels “locavòrs”.
 
La jornada sera completa amb la vesita del Musèu local de las Terralhas e la tasta —plan segur— d’un caçolet gostós a miègjorn. En fin de vèspre, Joan-Loís Gasc presentarà e signarà son libre novèl Il était une foi, Montségur a la bibliotèca del vilatge.
 
Jornada gratuita, levat lo dinnar-caçolet (12 èuros; inscripcions: +33(0)4 68 25 19 78; ostal.sirventes@...).
 
Los trabalhs començaràn a 10 oras del matin (acuèlh tre 9 oras e mièja).
 
 
Tot un formatge…
 
La Setmana de la Tasta, menada per l’Institut d’Estudis Occitans d’Aude, del diluns 13 al divendres 17 d’octòbre a Puègnautièr (Carcassés), s’interessarà als formatges del País d’Òc.
 
Una mòstra originala, “Occitània: país de formatges”, sera presentada, completada per unas fotografias prestadas pel Sindicat dels Productors de Pelardon.
 
Serà l’objècte de vesitas comentadas pels escolans del vilatge, aprèp la lectura estrena del diluns 13 (6 oras e mièja del vèspre): “Pan, pera e formatge”.
 
Dimècres 15, plaça a unes contes pel jove public amb l’Alan Roch: per un tròç de formatge (3 oras del vèspre) mentre qu’a 6 oras e mièja, a l’Ostal Sirventés (Carcassona), un talhièr dobèrt d’occitan se clinarà sul lexic formatgièr.
 
La serada del divendres 17 se dobrirà amb una conferéncia d’En Joan Flayol (president de la Cooperativa de Cevenas) sul pelardon (16 oras e mièja) abans un sopar a l’entorn d’un aligòt de tria (8 oras del ser; participacion: 12 èuros; inscripcion necessària: +33 (0)4 68 25 19 78 o ieo11@...) .
 
Unas emissions de ràdio sus Ràdio Lenga d’Òc Narbona e sus RCF-País d’Aude e unas cronicas gastronomicas dins La Semaine du Minervois completaràn lo platèl per ne saber mai sus Cantal, Ròcafòrt, Aussau, cabecon, pelardon, forma d’Embèrt, blaus, gaperon, Ròcamador, Sant Nectàrie, Vathmala...
 
 
 
 
IEO Aude
Contacte: +33 (0)4 68 25 19 78
ieo11@...

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article