Bandièra01 1180x150: Comuna de Tolosa

Actualitats

Los catalans e los araneses son convocats oficialament a votar sus l’independéncia lo 9 de novembre

Lo president Artur Mas a signat lo decret de convocacion e convòca formalament lo vòte. Lo govèrn espanhòl insistís per empedir lo vòte

Lo president de la Generalitat, Artur Mas, signèt ièr de matin lo decret de convocacion de la “consulta sul futur politic de Catalonha”, un referendum non constrenhent ont se demandarà als catalans se vòlon que Catalonha siá un estat independent. La signatura d’aquel decret se faguèt dins un acte solemne en un salon important del Palais de la Generalitat, amb la preséncia de totes los grops parlamentaris que sostenon lo vòte levat ICV-EUIA. D’aquel temps, la Plaça de Sant Jaume, davant lo palais, èra tota plena de mond que s’acampavan per sosténer lo vòte.
 
En seguida, lo president compareguèt davant los mèdias per defendre lo drech dels catalans de votar. Dins son discors, diguèt tanben de mots en espanhòl e en anglés per s’adreiçar a la populacion d’Espanha e als caps d’estat mondials. Tanben la presidenta de l’Assemblada Nacionala Catalana (ANC), Carme Forcadell, parlèt davant los mèdias e las massas acampadas e se felicitèt d’aquela convocacion. L’ANC a mes un grand relòtge sus un balcon d’aquela plaça que compta los jorns, las oras, las minutas e las segondas que mancan fins al jorn del vòte.
 
En seguida s’es traduch en occitan la lei que fa possibla aquela convocacion, lo decret qu’a signat lo president e tota la documentacion, los formularis, los bulletins de vòte, lo sit web etc., per que lo vòte se pòsca menar a tèrme en Aran.
 
A l’ora d’ara lo 93% de las comunas del Principat de Catalonha an manifestat oficialament lor sosten al vòte.
 
 
 
Reaccion d’Espanha
 
Lo president del govèrn espanhòl, Mariano Rajoy, a convocat per deman, diluns, una reünion del Conselh dels Ministres per aprovar los recorses d’inconstitucionalitat contra la lei catalana permetent lo vòte e contra la convocacion del vòte. A l’ora d’ara se descadena una seguida de reaccions politicas e juridicas de l’estat espanhòl que cèrca d’empedir aquel vòte. Segon lo president espanhòl Mariano Rajoy, Artur Mas “s’es mes dins lo fangàs”.



Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Redaccion
2.

As plan rason. Avèm rectificat lo títol

  • 2
  • 0
Gerard Joan Barceló Pèiralata
1.

Los catalans... e los occitans araneses, non? ;-)

  • 3
  • 1

Escriu un comentari sus aqueste article