La Bibliotèca Tamiment de l’Universitat de Nòva York recebèt en 2006 una donacion fòrça especiala: lo fons fotografic del Partit Comunista dels Estats Units (CPUSA). Son d’imatges que mòstran los nonanta ans d’istòria d’un dels partits comunistas mai desconeguts del Mond —mas pas brica petit—, nascut dins las luchas dels obrièrs e sindicalistas al començament del sègle XX. Una partida de la colleccion se pòt consultar en linha a travèrs d’aquel compte especial de Flickr.
 
Las fòtos tanben servisson a verificar las contribucions pas brica negligiblas de gaireben un milion de membres que son passats per aquel partit pendent aquelas annadas, en de domenis coma los dreches civils, lo trabalh, lo pacifisme e lo cambiament social dels Estats Units.
 
Lo Partit Comunista donèt en 2006 la colleccion a la Bibliotèca del Centre de Referéncia dels Estudis Marxistas (Library of the Reference Center for Marxist Studies), qu’es una seccion de la Bibliotèca Tamiment, per la far mai accessibla als estudiants, als cercaires e als activistas. Es un material fòrça interessant per comprene melhor l’esquèrra estatsunidenca, la lucha per la defensa de las libertats civilas dins lo país, lo movement pacifista e la complèxa relacion entre classa, raça e sèxe en aquel país.