Bandièra01 1180x150: Comuna de Tolosa

Actualitats

Espanha vòl tanben censurar la consulta canària

Lo president de Canàrias, Paulino Rivero
Lo president de Canàrias, Paulino Rivero
Catalonha es pas la sola comunautat autonòma espanhòla qu’encolerisca lo govèrn espanhòl del PP. Après la suspension ultrarapida de la consulta catalana sus l’independéncia pel Tribunal Constitucional, n’i a ja una autra que Madrid assaja d’empachar.
 
Lo 23 de novembre, lo govèrn canari de Paulino Rivero (Coalicion Canària, nacionalistas centristas) a decidit d’organizar una consulta dins l’archipèla per resòlver lo conflicte institucional amb l’estat espanhòl. D’efièch, lo govèrn canari s’opausa a las prospeccions petrolièras qu’impausa lo govèrn estatal mas que provòcan de protèstas popularas, e son intencion es de pausar aquesta question a sos ciutadans: “Cresètz que Canàrias deu cambiar son modèl environamental e toristic pr’amor de las prospeccions petrolièras?”
 
Per lo govèrn de Las Palmas, tanben sostengut per los socialistas insulars,  la consulta es legala, ja qu’es confòrma a la lei de participacion ciutadana que permet a las Illas Canàrias d’organizar de consultas sus de competéncias de l’archipèla. Bòrd que ten pas nada competéncia sus las prospeccions petrolièras, mas si que ne ten sus l’environament e lo torisme, la question pausada respècta la lei.
 
Aquesta interpretacion, la refusa la delegada del govèrn espanhòl, María del Carmen Hernández Bento, que tròba la question confusa e orientada. Declarèt lo divendres 3 d’octòbre —jorn que se publiquèt al bulletin oficial de l’archipèla lo decret de convocacion a la consulta— que lo govèrn estatal èra a mand de denonciar la consulta als tribunals, perque, çò ditz l’executiu, “excedís las competéncias” de las Illas Canàrias.
 
“Lo pòble canari parlarà e aurà l’ocasion de s’exprimir”, çò li respondèt Paulino Rivero.
 
Cossí que siá, se confirma la dificultat del govèrn espanhòl de daissar votar los ciutadans de las comunautats autonòmas e de dialogar amb elas per trobar de solucions acceptablas e democraticas.
 
 
 
 
GJB

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ròdrigò Bigòrra
2.

e'n França eras arregions an eth dret de convocar un referendum ?

  • 1
  • 0
Pirolet
1.

Multiplicar las consultas: belèu un biais de veire de qué es lo PP vertadièrament.

  • 2
  • 0

Escriu un comentari sus aqueste article