Bandièra01 1180x150: Comuna de Tolosa

Actualitats

Lo president de Catalonha a recebut mai de 900 cònsols que son anats sosténer lo vòte per l’independéncia

Lo Sindic d’Aran, Carlos Barrera, acompanhèt los cònsols araneses de Les e de Vielha

Catalonha visquèt dissabte una jornada istorica. Mai de nòu cents cònsols representants de las comunas de Catalonha e Aran foguèron recebuts pel president Artur Mas. Los cònsols liurèron al president los comptes renduts del sosten de lors municipalitats al referendum per l’independéncia del 9 de novembre que ven. Lo Sindic d’Aran, Carlos Barrera, acompanhèt los cònsols araneses Emílio Medan (UA) de Les e Àlex Moga (CDA) de Vielha.
 
Aquel acte seguissiá una amassada dels representants parlamentaris dels partits politics favorables al vòte, ont s’acordèron a l’unanitat sus una estrategia conjoncha per capitar lo referendum, malgrat la suspension del Tribunal Constitucional espanhòl que la demandèt lo govèrn de Mariano Rajoy.
 
“Çò que se passa en Catalonha es una provocacion democratica en majusculas. Quin estat que siá, en vesent las manifestacions d’aquestas annadas, las majoritats parlamentàrias en Catalonha, la manièra de las gents de s’exprimir positivament, o en vesent l’acte d’uèi, se seriá ja segut amb nosautres en negociant la faiçon legala de votar. Mas l’estat espanhòl o fa pas e nos pausa fòrça problèmas, obstacles, murs e ròcas per que trabuquem e per que contunhem pas en avançant. Totun lo nòstre messatge es fòrça clar, e se referma uèi: quitament s’ensajan d’arrestar la votz del pòble, capitaràn pas, nosautres capitarem”, çò diguèt Artur Mas dins son discors, que mercegèt las comunas per lor trabalh.
 
L’acte s’es acabat amb de crits d’independéncia de la majoritat dels assistents e lo cant de Els Segadors, coma se pòt verificar a la fin d’aqueste vidèo:
 
 


 
 
Engatjament e unitat politica
 
Divendres s’amassèron amb lo president catalan los representants dels partits del Parlament de Catalonha favorables al vòte: CIU, ÈRC, ICV-EUIA e la CUP. Après se reünir pendent tota la jornada, los participants anoncièron lor engatjament de téner l’unitat fins al 9 de novembre, e que, malgrat las diferéncias politicas, van totes amassa.
 
Après sèt oras de reünion, lo president anoncièt que “i a agut acòrdi” e remarquèt que la reünion s’èra “plan passada”. E mai s’auràn la prudéncia de revelar pas las estrategias pachadas, totes los amassats, a cha un, expliquèron als mèdias lors vejaires e lor unitat d’accion, coma o podètz vèire dins lo vidèo que seguís: 



Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
1.

Mentretant, per "informar", Le Monde publica un sondatge de El Pais, jornal anticatalan! Es vertat qu'aquestes dos se son bessonats...

  • 10
  • 0

Escriu un comentari sus aqueste article