Bandièra01 1180x150: Comuna de Tolosa

Actualitats

Brussèlas demanda d’explicacions a Espanha per aver menat l’infeccion de l’Ebòla en Euròpa

Mai d’una trentena de personas se tròban jos observacion

La Comission Europèa (CE) a demandat formalament d’explicacions al govèrn espanhòl a prepaus de la contagion per lo virus d’Ebòla d’una infirmièra de Madrid; qu’es lo primièr cas d’infeccion en Euròpa dempuèi que la malautiá rebrotèt en Africa al començament d’ongan. “La nòstra prioritat es de saber çò que s’es passat. L’espital afectat, coma fòrça autres espitals europèus, èra teoricament obligat de respectar de nòrmas fòrça estrictas per evitar precisament aquela contaminacion”, çò diguèt lo pòrtavotz de la Santat de la CE, Frederic Vincent.
 
La femna infectada, de 44 ans, foguèt menada ièr de matin a l’Espital Carlos III de Madrid, lo meteis centre ont sonhèron los religioses Miguel Pajares e Manuel García Viejo. Lo Ministèri espanhòl de la Santat manten en observacion mai d’un trentenat de personas qu’an agut un contacte dirècte amb l’infirmièra.
 
La femna trabalhava coma infirmièra en aquel espital de referéncia en malautiás infecciosas, e foguèt una de las sòcias de la còla que sonhèt lo religiós Manuel García Viejo. Aqueste darrièr moriguèt al l’espital Carlos III fa doas setmanas, quatre jorns après èsser repatriat de Libèria ont aviá contractat l’infeccion. A l’ora d’ara i a quatre personas isoladas e se fa un seguiment de 52 personas de mai. Parallèlament, lo ministèri revisa los protocòls de seguretat après l’error dins lo cas de l’infirmièra.
 
La femna infectada accediguèt en doas escasenças a la cambra ont se trobava isolat García Viejo. Un còp per cambiar un panèl al religiós malaut, e l’autre per remassar una partida del material sanitari après sa mòrt.
 
 
De personal sanitari non entraïnats ni informats
 
La presidenta de l’Associacion Madrilenca d’Infirmariá, Victòria Trujillo, denoncièt ièr a Catalonha Ràdio que, dempuèi qualques setmanas, se complissiá pas los protocòls pels cases d’Ebòla dins los espitals de Madrid. “Per sonhar un agent biologic del nivèl de l’Ebòla cal de gents entraïnadas e aquò s’es pas fach e mai s’o sollicitam dempuèi abril”, çò declarèt. De fach, Trujillo denoncièt que “los protocòls d’accion se son pas difonduts al près del personal sanitari”. “Las infirmièras son fòrça preparadas mas òm lor a pas donada l’informacion que caliá”, çò apondèt.
 
 
De protèstas a Madrid
 
Qualques centenats de salariats de l’Espital Universitari La Paz, de Madrid, manifestèron ièr davant lo centre. Exigisson la demission de la ministra espanhòla de la santat, Ana Mato, e del president de la Comunautat de Madrid, Ignacio González. Los acampats mostrèron tanben lor solidaritat amb lor companha infectada pel virus de l’Ebòla.

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
1.

La ministra Ana Mato es mai ocupada a torear la justícia per evitar que son corromput de marit ane a la preson que de la santat dels espanhòls. Coma aquel que, ocupat a cercar las fadetas del jornaliste de Le Monde daissava córrer lo Mohamed Merad. D'un costat e de l'autre del Pirenèu, la vertat es de la meteissa fusta.

  • 3
  • 0

Escriu un comentari sus aqueste article