‘A refòrma se preciset damb’una conferença de pressa dau Govèrn princíer ‘o 25 d’abril dau 2012. ‘O Ministre d'Estat representant dau Govèrn, Son Excellença Monsur Michel Roger, anonciet un projeit de lei sus l’avenir dei retiraias dau Principat de Mónego per crenhença de l’agotament dau sistèma de retiraias d’aicí a 2030 e per garantir ‘ai prestacions fins a 2050.

 

‘O Conselh Nacional (parlament) en retorn dau refús per ‘o Govèrn d’a primiera version dau projeit de lei, estudiet torna una autra proposicion ‘o 9 de mai.

 

A per tòca de precisar l’augmentacion dau taus de cotisacion suportat per ‘us empiegaires e ‘us salariats. Crea una variabla d’ajustament per far evoluïr ‘o taus fixe de 6,15%, d’una part, de 0.80% a 1,30% per ‘us empiegaires, e, d’autra part, de 0.40 a 0.70% per ‘us salariats. Prevei d'estabilisar l’evolucion dau nombre de ponches de retir dei salariats en utilisar ‘ai modalitats de determinacion dau salari de basa que serve au carcul dau nombre de ponches donats. Enfin, revisa ‘o finançament dau Fonds d’Accion Sociala, que permete notament de pagar l’allocacion au conjonch a l’atencion dei retirats ‘us plus modestas ò l’allocacion decès. ‘O projeit de lei prepausa de suprimir ‘o maximum actual, que limita a 20% dei produches dau Fonds de Resèrva d’a Caisha Autonòma dei Retiraias (CAR Caisse Autonome des Retraites, l’organisme de gestion dei retiraias dau sector privat) ‘a soma que poía èsser afectaia au Fonds d’Accion Sociala.

 

Menaia per l’Union dei Sindicats de Mónego (Union des Syndicats de Monaco, sindicat fondat ‘a a liberacion en 1945) ‘a jornaia dau 21 de junh siguet una jornaia de manifestacions per denonciar una remesa en causa dau retir a 60 ans, una perda de salari net (totas categorias professionalas mesquiaias) e una baisha dei pensions de retir.

 

‘Us manifestants s’agropèron partent de 13h dins ‘us diferents quartíers de Mónego (Fòntvielha, Ospital, Monte Carlo, ‘A Condamina) per convergir a 15h davanch ‘a CAR.

 

‘A discussion entre tots ‘us pertenaris socials va continuar torna.




Roman Rocabruna