Bandièra01 1180x150: Comuna de Tolosa

Actualitats

Estrasborg a condemnat tornarmai Espanha per enquestar pas sus las denóncias de torturas

La Cort Europèa dels Dreches Umans a condemnat l’estat espanhòl per lo cinquen còp: Espanha a ignorat las denóncias dels maltractaments infligits als detenguts en incomunicacion

La Cort Europèa dels Dreches Umans
La Cort Europèa dels Dreches Umans | CherryX
La Cort Europèa dels Dreches Umans (CÈDU) a condemnat tornarmai l’estat espanhòl per ignorar las denóncias de torturas. En aquela ocasion, la condemnacion seguís las denóncias dels ciutadans bascos Beatriz Etxebarria, detenguda en març de 2011, e d’Oihan Ataun, arrestat en novembre de 2008, segon çò que rapòrta Naiz. La cort europèa a ordenat que l’estat espanhòl pague una indemnitat de 29 000 èuros a Etxebarria, que 25 000 son per de damatges morals e 4000 en taxas dels procèsses estatal e europèu; e mai 24 000 a Ataun, dont 20 000 son per de damatges morals e 4000 en taxas dels procèsses.
 
La cort dels dreches umans a seguit lo clam pausat per l’avocat d’aqueles joves bascos, qu’invoquèt lo tresen article de la Convencion Europèa dels Dreches Umans, après que las autoritats espanhòlas faguèsson pas cap d’enquèsta sus las denóncias de tortura e de maltractaments pendent lo periòde d’incomunicacion que prevei la lei espanhòla dins los presumits delictes de terrorisme. L’afar d’Etxebarria ocasionèt de rambalh perque segon sa denóncia quitament la violèron amb un pal.
 
Segon los jutges, dins los dos cases “se faguèt pas las enquèstas efectivas que s’impausavan per la situacion de vulnerabilitat dels demandaires en detencion incomunicada”; e se remembra a l’estat espanhòl qu’es important d’adoptar las mesuras que recomanda lo Comitat per la Prevencion de la Tortura del Conselh d’Euròpa “per evitar d’abuses e per protegir l’integritat fisica dels detenguts”.
 
Amb las denóncias d’Etxebarria e Ataun, i a ja cinc senténcias condemnatòrias de la CÈDU contra l’estat espanhòl per enquestar pas sus de denóncias de torturas.
 
 
Las incomunicacions
 
Dins l’estat espanhòl, una persona pòt èsser detenguda en incomunicacion fins a 13 jorns, que pendent los 5 primièrs a pas drech de rescontrar cap de jutge. “Aquela practica facilita la tortura e los maltractaments e aumenta la violacion dels dreches umans contra los detenguts”, çò denóncia Amnestia Internacionala.
 
Mòstran tanben lor chepic, per aquel tipe de detencions, d’organismes coma lo Comitat contra la Tortura, lo Raportaire contra la Tortura de l’ÒNU e lo Comitat Europèu per la Prevencion de la Tortura.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article