Bandièra01 1180x150: País Invisible

Actualitats

Kobanê es tornarmai en mans del curds

Lo govèrn de Turquia a permés fin finala lo pas dels peshmèrgas, e mai s’es pas d’acòrdi per ajudar las milícias curdas

| wikimedia
La situacion de Kobanê ven de se revirar. Los jihadistas de l’Estat Islamic se serián retirats après que l’armada estatsunidenca aja lançat dempuèi los aires d’armas als guerrilhièrs curds e après qu’aja bombardat de posicions islamistas. Es çò que rapòrta la television iraquiana As Sumariyya. En mai d’aquò, Turquia a permés, fin finala, lo pas dels combatents peshmèrgas, que venon del Curdistan de l’estat iraquian cap al Curdistan de l’estat sirian (en passant per lo Curdistan de l’estat turc).
 
“Sens cap de dobte l’arribada de las armas cambiarà l’evolucion de la lucha”, çò soslinhèt Rami Abd Ar Rahman, director de l’Observatòri Sirian dels Dreches Umans. D’avions de transpòrt C-130 de la Fòrça Aeriana dels Estats Units lancèron ièr de paquets amb d’armas, de municions e de material medical.
 
Lo govèrn de Turquia es pas gaire content amb l’ajuda internacionala als curds. Acusa lo principal partit curd de Siria, l’YPG, d’èsser restacat al PKK, la milícia curda que combat l’armada de l’estat turc per reclamar mai d’autonomia per Curdistan.
 
 
Un combatent auvernhat
 
Beshdar Khosrow, un auvernhat d’origina curda, es tornat dins son país d’origina, après 19 ans passats en Occitània, per anar combatre amb los curds. Fa cinc meses que Khosrow anèt rescontrar las milícias curdas. Venguèt en Occitània en 1991 en fugissent los chaples de Saddam Husayn.
 
Son paire fasiá partida de la resisténcia curda d’alavetz, e ara Khosrow se n’es tornat al país d’origina per combatre l’Estat Islamic. La Montagne ne publica un reportatge.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article