Bandièra01 1180x150: Comuna de Tolosa

Actualitats

crotz-tolosaCreated with Sketch.ProvençaProvençaEsterèu

Frejús: lo Front Nacional e lo blòg Fdesouche se vantan d’aver arrestat la construccion d’una mosqueta

Lo cònsol FN pretend ara que n’a arrestat la construccion sens obesir a las pressions del blòg ultradrechista

David Rachline
David Rachline | Gauthier Bouchet
Après tres ans de gestacion, lo senator-cònsol de Frejús (Esterèu), David Rachline, del Front Nacional, ven de suspendre la construccion de la mosqueta del quartièr de La Gabèla. Aquela volontat de privar la populacion musulmana d’un luòc per pregar seguís la pression que s’es facha dempuèi lo blòg d’extrèma drecha Fdesouche.com.
 
Dempuèi abril de 2011, la municipalitat a cercat totes los arguments legals per empedir la construccion de la mosqueta. Rachline ne faguèt un tèma de campanha electorala e prometèt quitament un referendum sus aquel sicut. Mas en junh passat, semblariá que lo cònsol se vegèt resignat a daissar bastir la mosqueta, segon çò que publicava Le Canard Enchaîné.
 
De son costat, Le Figaro remembra que sèt meses après l’eleccion, lo referendum s’es pas fach, mas l’afar de la mosqueta es encara al centre dels discorses politics. Dins un discors fach a Cogolin, Rachline promet que dins un relambi de dètz jorns prendrà un arrèst suspensiu dels trabalhs.
 
Es aquí que Fdesouche se felicita en anonciant que “lo trabalh de lobbying de la réinfosphère [esfèra de reïnformacion] a fach fruch”.
 
Mas lo cònsol de Frejús reconeissiá pas aquela pression, e planh los atacs d’Fdesouche. Es aital que diguèt a Le Figaro qu’el èra la buta “d’una vertadièra cabala” sul web. “Sénher Sautarel [fondador d’Fdesouche] s’es exprimit còntra ieu sens saber. Eu ensaja de faire de còps sus son sit, que d’alhors ieu lo consulti pas”. Al delà, Rachline apondiá: “Fdesouche m’a pas impausat son calendier”. A respècte del referendum, lo cònsol precisèt qu’el es encara al començament de son mandat. “Ai bòn espèr que lo permés de construire siá declarat caduc. Mai s’una autra demanda de permés èra depausada, procediriam a aqueste referendum”, çò precisèt.
 
Lo blòg Fdesouche es fondat per Pierre Sautarel e es estat un dels pilars de la comunicacion numerica de l’extrèma drecha francista. Revendica mai d’80 000 vesitaires unics per jorn e ten una granda influéncia dins la basa electorala de l’FN.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Rostan 4 camins
4.

Au mens que Rachline pete pas la mosqueta frejulenca existenta : Al Missiri. De notar qu'es en remirable estil de terra seca africana, en recòrd dei sordats senegaleses, chadians... engatjats dins leis armadas franchimandas.

  • 2
  • 1
LACHAUD Dournazac (87)
3.

Dempuei lo chisma ente catolicas e islamistes i a una sala guera que continua enguera simbolisada per Clovis, lo rei daus francs. Son bateme es un contrat de maridatge entre lo poder politico-economic e la religion.
De tots temps, los poderos se son achaptats la religion, la sciença, la filosofia, los medias, la quita medecina,e tot aquò qu'avià un paur de poder dins los peoples per dominar e renhar.
Crestians, musulmans, jusius, scientifics, jornalistes, filosofs, laics, comunistes,, ensemble decolonarisrem la terra. Lo paubre es pas un esclau mas un diu. De las religions, los poderos an tirats : "Diu vos sauvera; Diu vos punit o vos venja".
Dins lo passat, i a una sola religion, una sola coneissença qu'es passada de civilisacions en civilisacions pus o mens desvirada per servir los poderos que disia : l'esser uman es una partida de Diu, la partida materiala. Sem reliats los uns aus autres e au tot. Nòstras pensadas an lo poder de modifiar nòstre environament e nòstre futur. De bonas pensadas menaron un monde d'amor. L'amor es una energia. Per esser benvulhent chau aver enveja de l'esser. Jalosiàsàs, paurs,, rivalitats menan a las gueras, a las malaudias. Los catars disian pas autre causa. La religion vertadiera di:" Los òmes se sauvaran an aver de bonas pensadas e en far l'efotrç de bian pensar. Dins totas las religions e las tradicions se parla d'aquò. Sur lo site interne "Bouger-la-vie, onglet : la double causalité", trobaretz un scientific que ne'n parla tan ben. i a mas los paubres per pensar que la conciença quò es ren e qu'an pas lo dreit de pensar..

  • 3
  • 0
Pirolet
2.

Es pas de creire cossí aquel tipe, lo Rachline, revèrta lo José Antonio, lo cap de còla dels faicistas espanhòls: meteissa camisa, meteis penchinat!

  • 3
  • 1
Cristian FORMENT AGEN
1.

Il faudrait rallumer tous les soleils, disiá Joan Jaurés, mes mens que mens los còrns (creissents) de luna, ce fornís lo tal Sautarel, de Fdesouche.

  • 1
  • 0

Escriu un comentari sus aqueste article