Una victòria provisòria per la vila roergassa de La Guiòla (Aubrac). La justícia europèa ven de metre fin, en favor de la vila occitana, a un conflicte de marca vièlh de sièis ans. La Cort de Justícia de l’Union Europèa anullèt dimars la marca depausada en 1993 per Gilbert Szajner, un particular parisenc (de la Val de Marna) qu’esplecha la comercializacion de cotelariá e que fa tanben de farda per l’ostal, de vestits, de batifuòcs e de barbacoas, importats mai que mai d’Asia. La decision de la justícia europèa pòt encara far l’objècte d’un recors en cassacion.
 
Lo calvari de La Guiòla comencèt en 1993, quand Szajner, conegut en Aubrac coma “lo Vampir de La Guiòla”, depausèt la marca Laguiole dins 38 categorias. La comuna roergassa alavetz se vegèt privada de la possibilitat d’emplegar lo sieu nom, e s’es sentida victima de “parasitisme” economic, coma disiá Vincent Alazard, cònsol de la vila. Es pr’amor d’aquò que demandèt al tribunal de granda instància de París de prononciar la “nullitat de las marcas” e l’“engana” envèrs los consumaires sus l’origina dels produches. Mas la justícia parisenca aviá pas retengut aquelas rasons.
 
A La Guiòla, èran espantats davant aquela “inèpcia juridica”, qu’es estada un còp dur per l’economia locala. “De chineses pòdon emplegar lo nom de la nòstra comuna en tota legalitat del temps que nosautres i vivèm e desvolopam lo saber-far dempuèi de decennis”, çò disiá lo cònsol tot còrfendut.
 
Los estatjants de La Guiòla an contunhat caparruts fins qu’an capitat. An amassat lo sosten de fòrça elegits de la region e dels grands noms de la comuna, de cotelièrs, de formatgièrs, etc. An quitament escrich a François Hollande per denonciar “una situacion inica” ont de “noms de vilas o vilatges pòdon venir proprietat de grops industrials, de la granda distribucion o d’un autre luòc, tan franceses coma estrangièrs”. Mas la justíca, a La Guiòla, es arribada d’al delà de França.