Qual dirà la doçor de la fin de junh en Rosselhon: la sason de las cerièras s’acaba; albricòts e persècs amaduran.. Mas i a pas d’albricòts e de persècs dins los vergièrs del nòrd d’Anglatèrra, o benlèu dins qualques sègles de rescalfament climatic… Doncas, aqueste divendres, lo termomètre tirava mal a passar la barra dels 10 grases e ploviá dempuèi dos jorns sus Hull: un temps a mandar ça que la doas equipas de Super-Liga sus la pelena.
Los Dracs se devián reprene aprèp doas desfaitas en seguida. Per afrontar Hull KR, Trent Robison aviá jogat a las cadièras musicalas faguent passar Tomas Bòsc de l’ala a la dobertura, Leon Pryce de la dobertura a l’arrièr e Clint Greenshields de l’arrièr a l’ala. Las condicions climaticas menèron a una partida amb plan de fautas de man e de penalitats.
A la 13ena minuta, Scott Dureau tustava un còp de pè "en banana" e Milalrd remandava la pauma sus Setamaita Sa que marcava, mas los Rovers prenián l’avantage abans la pausa amb un ensag transformat: 6-4.
La pluèja se metèt a tombar a ferratats. Dureau egalizava amb una penalitat. Los Rovers tornavan passar advant a l’ora de jòc sus una passa al pè. Passa al pè recuperada tanben per Greenshields qu’egalizava a 10 pertot a 5 minutas de la còrna.
A la 77ena, Dureau encapava un tombat improbable dels 35-40m. La defensa catalana contrava la tentativa anglesa de tombat e Dureau rajustava los dos punts d’une penalitat per clavar la partida sus una victòria catalana estequida mas importanta: 13-10. Foguèt complicat, mas aquela victòria confòrta la tresena plaça dels Dracs. Bon, pas lo temps de se pausar que Wakefield a ja pres la rota de Brutús per aqueste dissabte 30, sul còp de 4 oras del vèspre. Wakefield es una còlha que voldriá plan tornar dintrar dins las 8 plaças qualificativas per las pelhòfas.
Suspresa dissabte al Congrès de la Federacion a Salon de Provença. Dins una entrevista balhada a L’Indépendant, lo president Nicolau Larrat anoncièt que demandariá pas lo renovelament de son mandat e que las eleccions se tendrián tre lo dissabte 13 d’octobre. Lo nom de l’entrainaire de l’equipa de França es totjorn pas causit e benlèu que l’Aurelian Cologni, l’entrainaire de Lesinhan, contunharà son interim pels rescontres de tardor contra Anglatèrra e Galas. Demòra d’esperar que las eleccions federalas vendràn pas trebolar lo bon debanament del campionat.
La competicion d’Elita reprendrà lo 22 e lo 23 de setembre amb las dètz meteissas formacions qu’en suplement dels rescontres anar-tornar s’afrontaràn dins doas Dimenjadas magicas. La finala de la Copa es prevista per la mitat d’abril de 2013 (lo 13 o lo 14).
Las competicions de nacionala 1, 2, 3 e Promocion son reorganizadas. Aqueste estiu, a comptar de dissabte 30 de junh (e duscas al 22 de setembre; estrena: aqueste dissabte a 11h del matin), lo Musèu de Lauragués, al Presidial de Castèlnòu d’Arri, presentarà la mòstra dels Archius Departamentals d’Aude "
Les rugbys dans l’Aude des origines à 1980". Cal rapelar qu’a la fin de sa carrièra Puig-Aubèrt joguèt dins la capitala "mondiala" del caçolet e entrainèt la formacion locala de XIII.
Alan Roch
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari