Eth Ostau Comengés e Nosauts de Bigòrra que hèn despuish annadas un trebalh de cuelhuda e de difusion dera cultura orala de Gasconha (de Bigòrra a Coserans), en tot hèr enquèstas de terrenc au près deths locutors “naturaus” e en tot transméter aqueth patrimòni orau a travèrs de documentaris DVD e libes-CD.
 
Entà hèr conéguer eras diferentas produccions d’aquera colleccion Oralitat de Gasconha, que venguen de lançar un sit Internet que s’apèra oralitatdegasconha.net, dab ua botiga en linha segurizada e eth mandadís garentit a gratis. Entà cada article, que i a ua descripcion e tanben un extrèt àudio o vidèo.
 
Aqueth sit n’é cap solament un sit comerciau. Que i a tanben ua partida consacrada ara cuelhuda on arretrobam tròces inedits d’enquèstas, analisats e explicitats. Que pòt donc balhar idèas de presents entà Nadau mès que pòt tanben interessar eths que son tot simplament en arrecèrca d’informacions sus era lenga e era cultura d’aqueris parçans gascons pirenencs.
 
 
 
 
Joan-Pau Ferré