Bandièra01 1180x150: Comuna de Tolosa

Actualitats

Marselha revisa la “carta secors” que fasiá polemica

S’agís d’una carta d’identificacion que la devián portar los ciutadans sens domicili fixe e qu’especificava lors malautiás

Lo cònsol de Marselha a revisat una polemica “carta secors” destinada als ciutadans sens domicili fixe, segon çò que rapòrta Pourquoi Docteur. S’agís d’una carta que devián portar, de faiçon visibla, los ciutadans mai paures que vivon per carrièras. Segon Xavier Mery, adjonch al cònsol, delegat a l’integracion e la lucha contra l’exclusion, la carta deurà pas pus èsser visibla de manièra obligatòria. Tanpauc contendrà “ges d’informacion medicala destinada a restar confidenciala autra que lo grop sanguin dau portaire”.
 
 
La polemica
 
La fòrta polemica levada a forçat la municipalitat marselhesa a revisar aquela carta d’identificiacion pels ciutadans sens domicili fixe, que deviá mostrar lors donadas personalas e lor fotografia en indicant lors malautiás, lors problèmas de santat o lors allergias.
 
L’iniciativa de la comuna de Marselha e dels servicis socials aviá recebut de nombrosas criticas. D’un costat, la Liga dels Dreches Umans s’èra declarada inquieta a prepaus del grand triangle jaune marcat sus la carta. Dins aquel sens aviá mostrat son chepic per “la semblança d’aquela carta amb l’estela jauna que los josieus deguèron portar pendent la Segonda Guèrra Mondiala”. E mai, lo president del Collectiu dels Mòrts de la Carrièra, Christophe Louis, aviá explicat a The Local que de mostrar las malautiás d’una persona, aquò “respècta pas lo secret medical”. Per Louis, aquela mesura èra “escandalosa e estigmatizanta”.
 
Lo govèrn francés tanplan aviá criticat l’iniciativa. Marisol Touraine, ministra dels afars socials, aviá explicat dins una entrevista sus Le Parisien que se sentissiá “chocada”. “Obligar los sens-abric de portar un triangle jaune en indicant las malautiás que ne pòdon sofrir, es vergonhós. Se mòstra pas del det los mai paures. S’escriu pas lors malautiás sus lors vestits. Lo secret medical, en particular, es un drech fondamental”, çò aviá dich la ministra.
 
De lor costat, las autoritats de la Ciutat Focèa avián dich que la tòca èra d’ajudar lo personal sanitari qu’ajudan als malauts sens domicili fixe. Segon Xavier Mery, conselhièr municipal de Marselha, amb la contestacion de la carta, “se met[iá] en question, pas solament lo besonh d’un regim per lei personas sens domicili fixe, mai tanben l’engatjament de la vila, dau SAMU e dei volontaris per ajudar aquelei que n’an mai de besonh”. Mery aviá explicat tanben que 100 cartas s’èran distribuidas.
 
 



Marseille : le "triangle jaune" pour les SDF...per LaProvence

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article