Actualitats
Corsega: una collectivitat territoriala unica?
Lo 12 de decembre, abans mièjanuèch, los conselhièrs territorials còrses votèron amb un ample consens una proposicion de reforma administrativa de l’illa
Mentre que la reforma territoriala francesa es a mand d’èsser definitivament votada, mentre que los alsacians protèstan per carrièras contra la fusion forçada de lor region amb Lorena e Champanha-Ardena, l’Assemblada de Corsega venon de prepausar una autra mena de fusion.
Corsega, administrativament, es pas una region de l’estat francés mas, despuèi 1991, una collectivitat territoriala d’estatut particular, la Collectivitat Territoriala de Corsega (CTC) amb un pauc mai de competéncias, sens aver, totun, d’autonomia vertadièra. Sa personalitat mai importanta es pas lo president de la region mas lo president del Conselh Executiu, mena de govèrn de l’illa. Pasmens deu partejar l’administracion de l’illa amb dos departaments, la Nauta Corsega e la Corsega del Sud.
Lo 12 de decembre, abans mièjanuèch, los conselhièrs territorials, valent a dire los elegits de l’Assemblada de Corsega, votèron un cambiament prigond de l’organizacion administrativa de l’illa. Amb una majoritat ampla —42 conselhièrs en favor sus 51, eissits de l’esquèrra pròfrancesa que dirigís l’illa, dels partits autonomistas e independentistas còrses e de la drecha pròfrancesa; 8 contra, los 6 conselhièrs del Front d’Esquèrra e 2 elegits sus 12 de la drecha pròfrancesa mentre qu’una autra s’absteniá— votèron la fusion de la CTC e dels dos departaments en una Collectivitat de Corsega unica amb 63 “Conselhièrs de Corsega”. Per defugir un conflicte entre las doas vilas màgers de l’illa, puèi qu’Aiacciu es la capitala de l’illa e Bastia seriá pas pus la de la Nauta Corsega, Bastia tendriá la sedença d’una Cambra dels Territòris de 56 membres (27 per l’anciana Corsega del Sud e 29 per l’anciana Nauta Corsega, mai poblada) per executar las politicas de la Collectivitat de Corsega als nivèls infraregional e intercomunal. Se pòt pensar qu’ansin los elegits còrses vòlon empedir una revirada coma la del referendum de 2003, dins lo qual los estatjants de Bastia s’opausèron a la collectivitat territoriala unica e faguèron ganhar lo “non” amb lo 51% dels vòtes.
Ara ven a l’estat francés de decidir de la possibilitat de la reforma. Lo govèrn francés aurà de decidir s’accèpta de mençonar la proposicion de reforma dins la lei sus la nòva organizacion territoriala de la Republica, e, en cas que la lei siá votada puèi per lo Parlament, farà mestièr un referendum en Corsega per que siá valedoira.
Quand se sap que lo govèrn francés se mostrèt ostil a las demandas majoritàrias de la CTC de la cooficialitat de la lenga còrsa e de l’estatut de resident per luchar contra l’especulacion immobilièra, l’estrada sembla longa, mas almens es interessant de constatar un ample consens del pòble còrs per far evolucionar la societat.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#8- Lo distinguo-fòrça util-de G.J.Barceló èra pas tot prèst, li a calgut se documentar.
Avant d'enonciar de causas puslèu importantas, seriá una precaucion de préne totjorn. S'i ganha pas,senon, una reputacion de persona seriosa.
Coma còrs, m'agradariá de portar qualques precisions sus lo Front d'Esquèrra en Corsega. Es essencialament comunista e pas necessàriament ultrajacobin coma o pòt èsser lo Partit d'Esquèrra. En Corsega, i aguèt longtemps una division entre los comunistas del nòrd, estalinistas e jacobins, e los del sud, mai reformators e mens ideològs. Es d'aquesta sensibilitat lo president de l'Assemblada de Corsega, Dominique Bucchini, una figura istorica de la politica insulara. Parla còrs sens complèxes e per el lo pòble còrs existís e la lenga còrsa deu èsser oficiala: http://www.actukurde.fr/actualites/369/bucchini-la-france-a-peur-de-la-decentralisation.html.
Doncas, lo Front d'Esquèrra còrs s'es pas opausat al projècte de reforma per jacobinisme. Segon çò qu'ai comprés, es perque lor sembla "tròp neoliberal". Soi pas segur d'entendre lors arguments: en qué la desaparicion dels departaments es "neoliberala"?
#4- De la necessitat de reparar las injustícias.
Per aquò faire, prepausem una tièra significativa d"organizacions" "mai francistas, te mores" : l'extrema- dreita, l'UMP, los centres(centra que centraràs), lo Partit socialista, RDG, RDD, lo Front d'esquèrra, lo NPA, las Glèisas catolica, protestanta, evangelista, ebraïca, los Témoins de Jéhovah ... , la CFTC, lo MEDEF, la CGT, la CFDT, FO, Solidaires, la FSU ...
#5
Los coneissi pas tròp mas son pas a l'encòp occitanistas e anticapitalistas al movement Libertat! ?
Comprèni la preocupacion de daubuns de rompre amb l'ultracapitalisme. Per tant, per rompre, cal vendre son arma al Drac e simpatisar amb de partits politics ultrafrancistas que nos abòrran a nosautres los occitans e que simplament se compòrtan coma los nòstres enemics? Es plan triste se nos cal trigar entre lo comunisme francés o l'inèxisténcia politica occitana. Plan triste.
Cresi pas a una possibilitat de reforma dels partits franceses. L'occitanisme se pòt pas desvolopar al dintre d'aquestes partits. Es çò meteis qu'amb l'estat francés: pòt pas èsser que jacobin.
#3 Terric , cresi lo problèma es un pauc complicat : es que coneisses un partit elegible favorable als pòbles defintis per sas lengas en França que siá radicalament anticapitalista ? Se ta responsa es "non", as la responsa a ta question. Veses, i a d'occitanistas que non pòdon sofrir lo liberalisme financièr sostengut per l'UMP, lo FN, lo PS e mai EELV. Alavètz, se viran cap al Front d'Esquèrra, que ne sabèm tu coma ieu las flaquesas nacionalistas assimilacionistas… Me parlaràs benlèu del partit occitan. Perqué pas. Mas lo partit Occitan s'aliguèt a EELV qu'es lo partit de Cohnbendit, e aqueste arlèri es un defensor del liberalisme eurpoèu coma personalament, los pòdi pas sofrir. Fa que la causida anticapitalista es plan paura e estequida. Contra lo capitalisme, ieu, votariái ben Evo Morales, mas vòti pas dins lo estat per o far. El, mesprèsa lo poder financiarista, e defend las lengas, a l'encòp. Benlèu caldriá fondar una mena d'Esquèrra Republicana Occitana, que revertariá l'ERC ? Mas lo problèma de las aliganças malsanitosas se tornariá pausar coma amb lo POC… E puèi tabne, se caldriá botar d'accòrid per saber se sèm "autonomistas en França" o "independentistas d'ambe França". Ja que se pausa la question, quora fondam un partit aital.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari