Dins lo mercat dels esmartfòns (telefòns intelligents), cada fabricant ensaja de cercar de caracteristicas que singularizen son aparelh. Dins aquela granda concurréncia a espelit lo Fairphone, un aparelh lançat al mercat fa un an que ten totas las foncions basicas d’un esmartfòn amb la valor aponduda, que dins tot lo procès de fabricacion, an ensajat de seguir al maxim de critèris etics e justes. Lo Fairphone incorpora pas encara l’occitan al logicial, mas i incorpora ja lo catalan.
 
Lo procès de fabricacion del Fairphone es transparent e dobèrt, per satisfar un sector de clients conscientizats, mas tanben per conscientizar l’indústria per que siá mai responsabla amb las personas e amb l’environament. Es una granda filosofia resumida dins lo lèma: “crompa un telefòn mobil e aluca un movement”.