A L’Alguer —la vila catalana de l’illa de Sardenha—, lo sèti del jornal numeric Alguer.it foguèt atacat la matinada de dimècres passat, quand qualqu’un tirèt amb un rifle en traversant la pòrta e una fenèstra. L’atemptat se debanèt a pena quaranta uèch oras après la publicacion dels resultats electorals, que lo centresquèrra recuperèt lo poder. Pasmens, lo nòu primièr cònsol de L’Alguer, Stefano Lubrano, diguèt que voliá pas creire que l’atac aguèsse quicòm a veire amb lo resultat de las eleccions.
 
Lubrano diguèt, en una letra al jornal, que l’acat èra “fòl e desconsiderat, sustot perque arriba paucas oras après la fin d’eleccions caracterizadas pel jòc net”. Lo primièr cònsol de la vila faguèt un apèl “a totas las fòrças politicas per que la confrontacion entre las divèrsas opcions politicas ane pas jamai al delà de la linha de la civilizacion e del respècte mutual”. En mai d’aquò, lo cònsol remembra qu’Alguer.it es estat un mèdia important e totjorn imparcial.
 
Los sectors del jornalisme e de la politica an ja mostrat la lor solidaritat amb los trabalhadors d’Alguer.it. Dison qu’ara lo chepic màger es la lor seguretat e, o planhon, an de reconéisser qu’an paur.