Bandièra01 1180x150: Comuna de Tolosa

Actualitats

Los damnats de Ceallach

David Le Yaouang es un escrivan breton. Les Damnés de Ceallach (Los damnats de Ceallach) es lo sieu primèir libre. Apuèi escriguèt Opération Revival 946. Se dins aquel libre un èx-legionari e una call-girl fugissián de policièirs poirits amb la complicitat d’un militant breton, l’istòria de son primèir obratge se debanar dins l’Irlanda dau sègle XVIII. Un estrangèir es a beure un còp au taulèir dau sol bar de l’illa Ceallach, a l’oèst dau país. Degun sap pas qual es l’òme mas el sap quals son los autres clients (e lo mèstre!) e perque es aquí, dins aqueste bar, aqueste ser. Es vengut per reglar un compte, per tornar las peras au sac. Un compte vielh de 12 ans.
 
Dins aqueste relat la granda istòria jòga tanben son ròtle. E, benlèu es quitament lo ròtle principal. Sèm dins la fin dau sègle XVIII, los irlandés son a se rebelar contra l’ocupant anglés e vòlon marchar regde devèrs l’independéncia. Theobald Wolfe Tone es lo chap de la rebellion. Lo jove Padraig MacNamara jogarà son ròtle dins l’insurreccion el tanben au costat d’un membre de la sieuna familha. Mas qual?
 
David Le Yaouang es afogat d’Irlanda e aquò se vei. Dins aqueste libre, aprenèm d’episòdis de l’istòria d’Éire a travèrs dau raconte de l’astre de Padraig MacNamara. Aqueste es un eiretèir. L’eiretèir d’una tragèdia mas tanben d’una fortuna e d’un combat. Quin vai chausir?
 
 
 
 
Fabien Lécuyer
 
 
 
 
 
_____
LE YAOUANG, David, 2014, Les Damnés de Ceallach, Yoran Embanner, 168 paginas, 11 èuros

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article